Real Madrid យល់ព្រមទិញខ្សែបម្រើឆ្នើម១រូបរបស់ Ajax ក្នុងតម្លៃ៤៧លានផោន

អេស្ប៉ាញ៖ ក្លិបអធិរាជស Real Madrid ត្រូវបានគេរាយការណ៍ថា បានព្រមព្រៀងទិញខ្សែបម្រើឆ្នើមរបស់ក្រុម Ajax កីឡាករ Donny van de Beek ក្នុងតម្លៃ៤៧លានផោន​(ឬប្រមាណ៦១លានដុល្លារ) ។

ខ្សែបម្រើវ័យ២២ឆ្នាំរូបនេះ ជាគោលដៅរបស់ក្លិបធំៗជាច្រើននៅតំបន់អឺរ៉ុប បន្ទាប់ពីរូបគេបង្ហាញទម្រង់លេងយ៉ាងលេចធ្លោជួយក្រុម Ajax ឡើងដល់វគ្គពាក់កណ្ដាលផ្ដាច់ព្រ័ត្រព្រឹត្តិការណ៍ Champions League កាលពីរដូវកាលមុន។

ជាមួយគ្នានេះដែរ Real Madrid បានតាមទិញ Van de Beek តាំងពីទីផ្សារដោះដូររដូវក្ដៅឆ្នាំមុនមកម្ល៉េះ ដោយពួកគេយល់ឃើញថាជម្រើសជាតិហូឡង់រូបនេះ ជាបេក្ខភាពដ៏ស័ក្ដិសមក្នុងការមកជំនួសដំណែងខ្សែបម្រើវ័យចំណាស់ Luka Modric។

យោងតាមការចុះផ្សាយរបស់កាសែត Marca  បានឲ្យដឹងថា ក្លិបជើងឯក Champions League ១៣សម័យ Real Madrid បានយល់ព្រមនាំយក Van de Beek មកកាន់ទឹកដី Bernabeu ក្នុងតម្លៃ៤៧លានផោន ដោយនឹងបង្ហាញខ្លួនរូបគេនៅរដូវក្ដៅខាងមុខ។

គួរឲ្យដឹងដែរថា សម្រាប់រដូវកាលនេះក្នុងនាមជាខ្សែបម្រើ Van de Beek ចូលលេងឲ្យ Ajax បាន២៦ប្រកួត ស៊ុតបញ្ចូលទីបាន៨គ្រាប់និង Assists ឲ្យមិត្តរួមក្រុមបាន៨ដង គិតរាល់កម្មវិធីទាំងអស់៕

ប្រភព៖ dailymail