អបអរសាទរ! ភ្លៀងធំនៅប្រទេសអូស្ត្រាលីអាចជួយពន្លត់ភ្លើងឆេះព្រៃបានជាច្រើនកន្លែង ប៉ុន្តែវាអាចបណ្ដាលឲ្យកើតមានគ្រោះធម្មជាតិផ្សេងទៀត

អូស្ត្រាលី៖ ភ្លៀងខ្លាំងក្នុងប្រទេសអូស្ត្រាលីបានជួយពន្លត់ភ្លើងឆេះព្រៃចំំនួន៣២កន្លែង នៅក្នុងរដ្ឋ New South Wales ខណៈពេលដែលចំនួនអគ្គិភ័យបានធ្លាក់ចុះពី១២០ទៅ៨៨កន្លែង កាលពីព្រឹកថ្ងៃព្រហស្បតិ៍។ ចន្លោះថ្ងៃព្រហស្បតិ៍និងថ្ងៃអាទិត្យនេះ ការិយាល័យឧតុនិយមបានព្យាករណ៍ថា នឹងមានកម្ពស់ទឹកភ្លៀងពី៣០ទៅ៨០មីល្លីម៉ែត្រ នាភាគខាងកើតរដ្ឋ New South Wales។

គួររម្លឹកផងដែរថា ភ្លើងឆេះព្រៃបានសម្លាប់មនុស្សសរុប២៨នាក់ ហើយផ្ទះជាង២,០០០ខ្នងត្រូវបានបំផ្លាញ។ កម្ពស់ទឹកភ្លៀងចន្លោះពី២០ទៅ៤០មីល្លីម៉ែត្រក៏ត្រូវបានគេព្យាករណ៍ថានឹងកើតមាននៅក្នុងតំបន់ទឹកដីរាជធានីអូស្ត្រាលី និងភាគខាងលិចរដ្ឋ New South Wales ដែលជាទីកន្លែងមានគ្រោះរាំងស្ងួតអស់រយៈពេល៣ឆ្នាំកន្លងមកហើយ។ ចំណែកទីក្រុងស៊ីដនីរួមទាំងតំបន់ដែលទទួលរងគ្រោះដោយសារភ្លើងឆេះព្រៃត្រូវបានគេព្យាករណ៍ថា នឹងទទួលបានបរិមាណទឹកភ្លៀងពី៣ទៅ៨មីល្លីម៉ែត្រនៅថ្ងៃព្រហស្បតិ៍ ពី៨ទៅ២០មីល្លីម៉ែត្រនៅថ្ងៃសុក្រ និងពី៨ទៅ២៦មីល្លីម៉ែត្រនៅថ្ងៃសៅរ៍។ ល្បឿនខ្យល់ដែលមានកម្លាំងរហូតដល់១៣៣គីឡូម៉ែត្រក្នុងមួយម៉ោង ​បានបោកបក់ទីក្រុង និងបណ្ដាលឲ្យខូចខាតផ្ទះសម្បែងអស់ជាច្រើន មុនពេលព្យុះបានឆ្លងកាត់ ហើយការព្រមានត្រូវបានប្រកាស មុនព្រឹកព្រលឹម។

ទោះជាយ៉ាងណា ព្យុះផ្គររន្ទះក៏នៅតែជាក្ដីកង្វល់មួយដែរ ពីព្រោះរន្ទះអាចបណ្ដាលឲ្យមានភ្លើងឆេះព្រៃកាន់តែច្រើនផងដែរ។ ព្យុះផ្គររន្ទះក៏អាចបណ្ដាលឲ្យមានខ្យល់បោកបក់ និងជំនន់ទឹកភ្លៀងដោយសារតែភ្លៀងធំ៕