អង្គធាតុដែលមានអាយុចំណាស់បំផុតនៅលើផែនដីត្រូវបានគេរកឃើញនៅលើអាចម៍ផ្កាយមួយ

បរទេស៖ បើតាមសារព័ត៌មាន CNN បានឲ្យដឹងថា កាលពី៥០ឆ្នាំមុន អាចម៍ផ្កាយមួយបានធ្លាក់ចូលមកកាន់ផ្ទៃផែនដីរបស់យើង ហើយបានធ្លាក់ចំប្រទេសអូស្ត្រាលី។ អ្វីដែលគួរឲ្យចាប់អារម្មណ៍នោះគឺ វាបានពាំនាំនូវសំណាកដ៏កម្រមួយពីអន្តរប្រព័ន្ធតារានៅក្នុងលំហ។ ការវិភាគថ្មីនៃអាចម៍ផ្កាយមួយនេះ បានបង្ហាញពីកម្ទេចធូលីតារាដែលបានកកើតឡើងរវាងពី៥ទៅ៧ប៊ីលានឆ្នាំមុន។ នោះហើយដែលធ្វើឲ្យអាចម៍ផ្កាយនិងកម្ទេចធូលីតារារបស់វា គឺជាអង្គធាតុដែលមានអាយុចាស់បំផុតដែលគេរកឃើញនៅលើផែនដី។ ព្រះអាទិត្យរបស់យើងមានអាយុត្រឹមតែ៤.៦ប៊ីលានឆ្នាំប៉ុណ្ណោះ ដែលមានន័យថាកម្ទេចធូលីតារានោះគឺបានកើតឡើងមុនព្រះអាទិត្យឬប្រព័ន្ធព្រះអាទិត្យយើងទៅទៀត។ កម្ទេចធូលីដែលរកឃើញនៅលើអាចម៍ផ្កាយនោះត្រូវបានគេឲ្យឈ្មោះថា កម្ទេចបុរេព្រះអាទិត្យ (presolar grains) ពីព្រោះពួកវាបានកកើតមុនព្រះអាទិត្យរបស់យើង។

តារាកើតឡើងនៅពេលដែលឧស្ម័ន ធូលី និងកម្ដៅរួមបញ្ចូលគ្នា ហើយពួកវាអាចមានអាយុកាលរាប់លាននិងរាប់ពាន់លានឆ្នាំ។ មុនពេលស្លាប់ ពួកវាបានបញ្ចេញធាតុផ្សំសំខាន់ៗរបស់វាទៅក្នុងលំហ។ បើសិនជាអាចម៍ផ្កាយមិនបានហោះបុកអង្គផ្សេងៗក្នុងលំហទេ យ៉ាងហោចណាស់ពួកវាក៏អាចនឹងហោះប៉ះឬជាប់កម្ទេចកំទីផ្សេងៗ ដូចជាកម្ទេចធូលីតារាជាដើម។ នោះជាមូលហេតុនៃការរកឃើញកម្ទេចបុរេព្រះអាទិត្យដែលនៅជាប់នឹងអាចម៍ផ្កាយគឺមានភាគរយតិចមែនទែន ដោយវាមានត្រឹមតែ៥ភាគរយនៃអាចម៍ផ្កាយដែលត្រូវបានគេរកឃើញនៅលើផែនដី៕