ភ្នំពេញ៖ ពិធីបុណ្យចូលឆ្នាំចិនឬ តាមប្រជាជនជាតិចិន គេហៅបុណ្យនេះថា បុណ្យនិទាឃរដូវ គឺជាបុណ្យចូលឆ្នាំប្រពៃណីជាតិរបស់ចិន ដែលជនជាតិចិនប្រកាន់យកថ្ងៃនេះជាថ្ងៃឈប់សម្រាក ដ៏សំខាន់បំផុតសម្រាប់ជួបជុំបងប្អូន និងរៀបចំសែនព្រេងទទួលយកនៅ លាភសំណាងសម្រាប់ឆ្នាំថ្មីរបស់ពួកគេ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សជាទូទៅពិធីបុណ្យនេះគឺ ចាប់ផ្តើមឡើងពីថ្ងៃទី១ ច័ន្ទគតិក្នុងប្រតិទិនរបស់ចិន ហើយបញ្ចប់ទៅវិញនៅថ្ងៃទី១៥ ដែលគេហៅថាពិធីបុណ្យឆ្លងគោម។ ពិធីបុណ្យចូលឆ្នាំចិនត្រូវបាន ប្រជាជនជាតិចិនចាត់ទុកថាជា ថ្ងៃដ៏មានសារៈសំខាន់បំផុត សម្រាប់ពួកគេ ហើយពិធីបុណ្យចូលឆ្នាំប្រពៃណីចិននេះ ក៏មានឥទ្ធិពលលើប្រទេសមួយចំនួន ដែលមានចំនួនប្រជាជនចិនរស់នៅ និងជាប់សែស្រឡាយចិនច្រើនដូចជា ប្រទេសសឹង្ហបុរី ឥណ្ឌូនេស៊ី ម៉ាឡេស៊ី ហ្វីលីពីន ថៃ រួមទាំងប្រទេសកម្ពុជា និងប្រទេសដទៃទៀតដែលមាន ប្រជាជនចិនរស់នៅស្របច្បាប់ច្រើន។
ជាក់ស្តែងបើនៅក្នុងប្រតិទិនរបស់ ប្រទេសកម្ពុជាយើងពិធីបុណ្យចូលឆ្នាំចិន នៅក្នុងឆ្នាំ២០២០ ត្រូវដែលជាឆ្នាំជូតនេះ នឹងរៀបចំប្រារព្ធធ្វើឡើងចាប់ពី ថ្ងៃទី២៤ ខែមករា រហូតដល់ថ្ងៃទី២៧ ខែមករា ដោយអាចមានភាពប្រែប្រួល ទៅតាមថ្ងៃនិងខែតាមឆ្នាំនីមួយៗផងដែរ។
ម្យ៉ាងវិញទៀតនោះអ្វីដែល ប្រជាជនចិនភាគច្រើន តែងតែគិតបំផុតនោះគឺ ឆ្នាំឆុងនេះតែម្តង ពីព្រោះពួកគេតែងតែប្រកាន់ខ្ជាប់ថា ចំពោះបុគ្គលណាដែលមានឆ្នាំឆុង ក្នុងឆ្នាំថ្មីគឺត្រូវតែទៅរំដោះគ្រោះចេញ។ បើមិនដូច្នោះទេនឹងអាច ធ្វើឲ្យបុគ្គលនោះ ជួបនៅរឿងមិនល្អក្នុងឆ្នាំថ្មី រឿងចង្រៃ ប្រកបរបររកស៊ីមិនឡើង ចេះតែស្រុតចុះទៅៗ ឬអាចបង្កជាគ្រោះថ្នាក់ រហូតបើឆុងខ្លាំងអាចនាំឲ្យប៉ះពាល់ ដល់ជីវិតថែមទៀត នេះបើតាមជំនឿនៃ ការឆុងឆ្នាំរបស់បងប្អូនជនជាតិចិន។
សម្រាប់ឆ្នាំឆុងនៅក្នុងឆ្នាំជូតនេះគឺ មានដូចជាឆ្នាំមមី ដែលមានភាគរយឆុងរហូតដល់ទៅ១០០ភាគរយ រីឯឆ្នាំជុត ឆុង៧៥ ភាគរយ បន្ទាប់ទៀតគឺឆ្នាំថោះ ឆុង៥០ភាគរយ និងចុងក្រោយនោះគឺឆ្នាំរកា ឆុង២៥ ភាគរយ។
ចំណែកទីកន្លែងដែល បងប្អូនខ្មែរជាប់សែស្រឡាយចិនភាគច្រើន តែងតែជឿជាក់ទៅធ្វើការ រំដោះគ្រោះចេញនោះគឺ ទីកន្លែងដែលគេតែង ហៅថាខ្លាស ដែលមានទីតាំងស្ថិតនៅ ក្នុងរមណីយដ្ឋានប្រវត្តិសាស្ត្រវត្តភ្នំ ជាកន្លែងដ៏ល្បីក្នុងការធ្វើពិធី រំដោះគ្រោះ និងបណ្តេញនូវរឿងចង្រៃពីឆ្នាំចាស់។
បើតាមប្រសាសន៍លោកតា ដែលជាអ្នកដែលប្រចាំការនៅកន្លែង រំដោះគ្រោះនេះផ្ទាល់បានមានប្រសាន៍ថា តាមជំនឿក៏ដូចជាតាមទំនៀមទម្លាប់ សម្រាប់បងប្អូនដែលចង់មករំដោះគ្រោះទាំងអស់ ត្រូវនាំយកមកជាមួយនៅដង្វាយ ចំនួន៣មុខសំខាន់ៗ មានដូចជាសាច់ជ្រូកឆៅ១ដុំ ស៊ុត យីហ៊ឺក្រៀម រួមទាំងក្រដាសសែន ទាន ធូប និងផ្លៃឈើជាដើម។
ជាចុងក្រោយពិធី ក្នុងការធ្វើនោះគឺ អ្នកដែលមានគ្រោះ ត្រូវអូជធូបរួចធ្វើការបន់ស្រន់ បន្ទាប់មកយកសាច់ជ្រូកឆៅនោះ ទៅដាក់នៅក្នុងមាត់របស់ រូបសំណាក់ខ្លាំស ចំណែកស៊ុតវិញគឺត្រូវយកទៅគោះនឹងក្បាលខ្លាស ឲ្យបែករួចបោះចោល ឬអាចយកទៅដាក់ក្នុងមាត់របស់រូបសំណាក់ខ្លាស ព្រោះតាមជំនឿជឿថារឿងអាក្រក់ និងរឿងអពមង្គលទាំងឡាយ នឹងរសាត់ទៅជាមួយស៊ុត ដែលបោះចោលនោះ ជាក់ជាមិនខាននោះទេ៕