ប្រទេសថៃ៖ តំបន់ខ្លះនៃស្រុក Muang និងស្រុក Mae Moh ភាគខាងជើងប្រទេសថៃគឺជាកន្លែងកំពុងមានបញ្ហាដែលបង្កឡើងដោយកម្រិតភាគល្អិតតូចៗក្នុងបរិយាកាសប្រមាណជា ២,៥ មីលីម៉ែត្រ ឬតិចជាងនេះ ដែលបានធ្វើអោយតំបន់មួយចំនួនក្នុងស្រុកទាំង២ខាងលើទាំងនេះស្ថិតនៅក្នុងតំបន់ក្រហមរយៈពេល ៨ ថ្ងៃជាប់ៗគ្នា។ ជាងនេះទៀតនោះ កាលពីព្រឹកថ្ងៃច័ន្ទ​ ទី១៣ ខែមករា ឆ្នាំ២០២០ តំបន់ទាំងនោះត្រូវបានគ្របដណ្ដប់ដោយផ្សែងអ័ព្ទយ៉ាងក្រាស់ ។

ផ្សែងអ័ព្ទដ៏ក្រាស់បានគ្របដណ្ដប់លើទីប្រជុំជន Lampang និងតំបន់ជុំវិញនោះ ដែលមិនអាចមើលអ្វីឃើញច្បាស់ និងជាហេតុធ្វើអោយការធ្វើដំណើរនៅពេលព្រឹកមានភាពលំបាកសម្រាប់អ្នកបើកបរ។

នៅក្នុងស្រុក Mae Moh ស្ថានីយ៍អាកាសធាតុនៃនាយកដ្ឋានត្រួតពិនិត្យការបំពុលបរិយាកាសបានរាយការណ៍ថា កម្រិត PM2.5 ត្រូវបានវាស់នៅចំណុចដែលទាក់ទងនឹងសុខភាពមិនល្អ ៩៨ នៅតំបន់ Ban​ Dong និង ៩៧ នៅតំបន់ Mae Moh ។ សម្រាប់នៅក្នុងស្រុក Muang កម្រិត PM2.5 គឺមានចំនួន ៩៤ នៅតំបន់​ Phra Bat ។ ហើយមានកម្រិតលើស ៩០ ស្ថិតនៅក្នុងតំបន់ក្រហម ដែលកម្រិតនេះអ្នកជំនាញចាត់ទុកថាមានគ្រោះថ្នាក់ដល់សុខភាព។

ផ្សែងអ័ព្ទដ៏ក្រាស់នេះ​ ត្រូវបានគេលើកឡើងថាបណ្តាលមកពីការដុតព្រៃនៅតាមតំបន់ជាច្រើននៃខេត្ត។​ ការដុតព្រៃដោយបើកចំហពីសំណាក់កសិករបានធ្វើអោយស្ថានការណ៍កាន់តែអាក្រក់ទៅៗ ពិសេសនៅពេលដែលពួកគេឈូសឆាយដីសម្រាប់ដាំដំណាំនៅមុនពេលនៃការហាមឃាត់ការដុតព្រៃ ចាប់ពីថ្ងៃទី ១ ខែមីនា ដល់ថ្ងៃទី ៣០ ខែមេសា ដែលបានកំណត់ដោយអាជ្ញាធរខេត្ត។

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 098282890 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]

ចង់ក្លាយជាអ្នកសរសេរក្រៅម៉ោងមានប្រាក់ចំណូលសូមចុះឈ្មោះទីនេះ