អាមេរិក៖ ការសម្រេចចិត្តរបស់ក្រសួងមហាផ្ទៃអាមេរិកក្នុងការបញ្ឈប់កម្មវិធីដ្រូនស៊ីវិល អាចនឹងត្រូវធ្វើឡើងជារៀងរហូត។ ប្រភពព័ត៌មានពីកាសែត Finical Times បានអះអាងថាក្រសួងគ្រោងបញ្ចប់ការប្រើប្រាស់ដ្រូនជិត១,០០០គ្រឿងជាអចិន្ត្រៃយ៍ បន្ទាប់ពីបានកំណត់ថាវាអាចនឹងមានហានិភ័យខ្ពស់ពីរដ្ឋាភិបាលចិនដែលប្រើកម្មវិធីរបស់ដ្រូនទាំងអស់នោះក្នុងគោលបំណងធ្វើចារកម្ម។

ជាធម្មតា ដ្រូនអាចត្រូវបានប្រើសម្រាប់ស្ថានភាពជាបន្ទាន់ដូចជាពិនិត្យមើលលក្ខណៈភូមិសាស្ត្រដីនិងតាមដានធនធានផ្សេងៗ។ ក្រុមហ៊ុន DJI ដែលជាអ្នកផលិតដ្រូនរបស់ចិនបាននិយាយថា ក្រុមហ៊ុនចង់ពិនិត្យមើលឡើងវិញនូវកម្មវិធីដ្រូនរបស់ខ្លួនដែលត្រូវបានប្រើប្រាស់ដោយក្រសួងមហាផ្ទៃអាមេរិក ដើម្បីបង្ហាញពីសេចក្ដីទុកចិត្ត។

ដ្រូនរបស់ក្រុមហ៊ុន DJI

កាលពីឆ្នាំ២០១៧ កងទ័ពរបស់អាមេរិកបានឈប់ប្រើប្រាស់ដ្រូនរបស់ក្រុមហ៊ុន DJI និងបានចោទប្រកាន់ថាកម្មវិធីរបស់ដ្រូនបានបញ្ជូនទិន្នន័យសំខាន់ៗដល់មន្ត្រីចិន។ ទោះជាយ៉ាងនេះក្ដី មិនទាន់មានភស្ដុតាងជាសាធារណៈណាមួយបង្ហាញថាប្រទេសចិនទទួលបានទិន្នន័យពីដ្រូននោះទេ។

លើសពីនេះទៅទៀត បុគ្គលិកក្នុងក្រសួងមានការមិនពេញចិត្តក្នុងការបញ្ឈប់ការប្រើប្រាស់កម្មវិធីដ្រូន ពីព្រោះវាអាចរំខានដល់សកម្មភាពដ្រូនដែលមានប្រយោជន៍ពិតប្រាកដ។ ទីភ្នាក់ងារ Fish and Wildlife Service របស់អាមេរិកបានប្រើប្រាស់ដ្រូន សម្រាប់ការរាប់ចំនួនសត្វព្រៃនិងត្រួតពិនិត្យតំបន់ដែលរងគ្រោះដោយសារភ្លើងឆេះ។ ខណៈខាងផ្នែកភូគព្ភសាស្ត្ររបស់អាមេរិកនៅតែប្រើដ្រូន សម្រាប់ត្រួតពិនិត្យកសិកម្ម ការរញ្ជួយដី និងគ្រោះទឹកជំនន់ជាដើម៕

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 098282890 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក បច្ចេកវិទ្យា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]