Decathlon Sports Festival លើកទី៣ ទទួលការគាំទ្រយ៉ាងពេញទំហឹងពីសំណាក់អ្នកចូលចិត្តលេងកីឡា! (មានវីដេអូ)

ភ្នំពេញ៖ Decathlon Cambodia បានប្រារព្ធព្រឹត្តិការណ៍ Decathlon Sports Festival លើកទី៣ នាថ្ងៃទី១២ ខែមករា ឆ្នាំ២០២០ នៅផ្សារទំនើបអ៊ីអនម៉ល សែនសុខស៊ីធី ចាប់ពីម៉ោង ១:៣០ នាទីរសៀល រហូតដល់ម៉ោង ៧:៣០ នាទីល្ងាច។ ព្រឹត្តិការណ៍នេះជាព្រឹត្តិការណ៍កីឡាដែលធំជាងគេនៅកម្ពុជាដែល មានការចូលរួមសហការណ៍ពីដៃគូទាំង២១ រួមមានក្លិបកីឡា និង សហព័ន្ធកីឡា។

លោក ចេប៊ី (Jean Baptiste Prigent) អ្នកគ្រប់គ្រង Decathlon បានថ្លែងក្នុងពិធីឱ្យដឹងថា Decathlon Sports Festival បានធ្វើឡើងចំនួន២លើករួចមកហើយកាលពីឆ្នាំ២០១៩ ហើយបានទទួលការគាំទ្រយ៉ាងពេញទំហឹងពីសំណាក់អ្នកចូលចិត្តលេងកីឡា និងគាំទ្រវិស័យកីឡាក្នុងប្រទេសកម្ពុជា។

លោក ចេប៊ី បានបញ្ជាក់ថា ព្រឹត្តិការណ៍នេះគឺបង្កើតឡើងក្នុងគោលដៅពង្រីកនៅសក្តានុពលនៃការលេងកីឡា និងជួយដល់ប្រជាជនកម្ពុជាឲ្យបានស្វែងយល់ពីកីឡាឲ្យបានច្រើន។ អ្នកចូលរួមអាចចូលរួមលេងដោយសេរី។ ជាពិសេសនោះគឺមានកម្មវិធីកីឡាជាច្រើនដូចជា បាល់ទាត់ ហ្សាមបា យូហ្គា បាល់បោះ ប៉េងប៉ុង ជិះសេះ ឡើងភ្នំត្រាំប៉ូលីន និងការសម្តែងសមត្ថភាពពីដៃគូសហការ។ Decathlon គឺជាក្រុមហ៊ុនកីឡាបារាំងមួយ ដែលបានបង្កើតឡើងនៅក្នុងឆ្នាំ ១៩៧៦ ហើយកំពុងប្រតិបត្តិការនៅក្នុង ៥០ ប្រទេសទូទាំងពិភពលោកនាពេលបច្ចុប្បន្ននេះ។ គោលបំណងរបស់ Decathlon គឺដើម្បីផ្តល់ជូននូវសម្ភារៈកីឡាដ៏សម្បូរបែបសម្រាប់អ្នកលេងកីឡាទាំងអស់នៅកម្ពុជា។

សូមរំលឹកថា Decathlon បានមកដល់ប្រទេសកម្ពុជាតាំងពីឆ្នាំ២០១១ ដោយបានចាប់ផ្តើមធ្វើការផលិតសម្ភារៈកីឡានៅក្នុងប្រទេសកម្ពុជា ហើយនៅឆ្នាំ២០១៨ បានចាប់ផ្តើមការលក់រាយនូវសម្ភារៈកីឡាជាមួយនឹងគោលបំណង ដើម្បីផ្តល់ភាពងាយស្រួលដល់ប្រជាពលរដ្ឋនៅក្នុងប្រទេសកម្ពុជាក្នុងការស្វែងរកសម្ភារៈកីឡាដែលពួកគេត្រូវការ។

Decathlon រចនា បង្កើត និងផលិត ហើយលក់ផលិតផលស្តង់ដារ ដែលមានគុណភាពខ្ពស់ជាមួយនឹងតម្លៃសមរម្យដែលអាចទទួលយកបាន ដែលមានកីឡាជាង ៥០ សម្រាប់អ្នកចាប់ផ្តើមដំបូង និងកីឡាករដែលមានបទពិសោធន៍ ឬអ្នកជំនាញ៕