មានកីឡាករកម្ពុជាយើងចំនួន ៤រូបដែលធ្លាប់ប្រកបអាជីពនៅលីគកំពូលបាល់ទាត់ម៉ាឡេស៊ី (Malaysia Super League) ក្នុងនោះរួមមានដូចជា ចាន់ វឌ្ឍនាកា, ធារី ចន្ថាប៊ីន, កែវ សុខផេង និង ប្រាក់ មុន្នីឧត្តម។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សនិយាយដោយឡែក កែវ សុខផេង បានផ្លាស់ពីភ្នំពេញក្រោន ទៅចូលរួមជាមួយក្លិប PKNP របស់ម៉ាឡេស៊ីកាលនៅរដូវកាល ២០១៨។ ចំណាយរយៈពេលកន្លះរដូវកាលនៅលើទឹកដីប្រទេសអាស៊ីអាគ្នេយ៍ដីកោះមួយនេះ សុខផេង រកបានគ្រាប់បាល់តែមួយគ្រាប់ប៉ុណ្ណោះ។
មួយគ្រាប់នោះរកបានពីបង្ហាញខ្លួនផ្លូវការលើកដំបូងឲ្យ PKNP និងជាការប្រកួតបើកឆាក Malaysia Super League 2018 ផងដែរ ដោយពេលនោះ PKNP បានយកឈ្នះ Negeri Sembilan ក្នុងលទ្ធផល ១ទល់នឹង០។ ខ្សែប្រយុទ្ធមានដើមកំណើតពីខេត្តក្រចេះ បានស៊ុតប្រឡោះជើងអ្នកចាំទីរបស់ Negeri Sembilan ចូលទីយ៉ាងល្អបន្ទាប់ពីទទួលបាល់បញ្ជូនពីមិត្តរួមក្រុមតាំងពីនៅភ្នំពេញក្រោនជាមួយគ្នា Gi-Sung។
យ៉ាងណាមិញ រួមរស់ជាមួយ PKNP បានត្រឹមតែពាក់កណ្ដាលរដូវកាល កែវ សុខផេង ក៏បានត្រឡប់មកកាន់កម្ពុជាវិញ ដោយចូលរួមជាមួយក្លិបបាល់ទាត់វិសាខាមកដល់បច្ចុប្បន្ន ហើយខណៈពេលនេះ សុខផេង កំពុងតែមានវត្តមាននៅក្នុងប្រទេសថៃដើម្បីចូលរួមការប្រកួត Pre-Season របស់វិសាខា៕
ចង់ឃើញថា គ្រាប់បាល់តែមួយគ្រាប់របស់ កែវ សុខផេង នៅលីគកំពូលម៉ាឡេស៊ី ល្អយ៉ាងណានោះ ទៅទស្សនាវីដេអូខាងក្រោមទាំងអស់គ្នា៖