អ៊ីតាលី៖ ក្រុមតោខៀវ Chelsea ត្រូវបានគេរាយការណ៍ថា កំពុងចរចាជាមួយនឹងក្លិបយក្សអ៊ីតាលី Napoli ចុះកុងត្រាយកខ្សែប្រយុទ្ធ Dries Mertens ដោយគ្មានតម្លៃខ្លួនក្នុងទីផ្សារដោះដូររដូវក្ដៅខាងមុខ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សយោងតាមការចុះផ្សាយរបស់កាសែត Le10Sport ខ្សែប្រយុទ្ធក្រុម Napoli រូបនេះអាចនឹងធ្វើដំណើរមកកាន់ទឹកដី Stamford Bridge នៅពេលដែលកុងត្រារបស់គាត់អស់សុពលភាពនាបញ្ចប់រដូវកាល។
គិតមកទល់ពេលនេះ Mertens រួមរស់ជាមួយ Napoli បាន៧រដូវកាលមកហើយ ដោយធ្លាប់ឈ្នះពានតែ២ដងប៉ុណ្ណោះជាមួយក្លិបអ៊ីតាលីនេះ រួមមាន ពាន Italian Cup និងពាន Italian Super Cup ក្នុងឆ្នាំ២០១៤។
ហើយគាត់ក៏ធ្លាប់បានបង្ហើបថា គាត់មានបំណងចង់ទៅចូលរួមជាមួយក្លិបណាដែលអាចប្រជែងយកពានជាប្រចាំបាន។ ក្រោយលេចឮដំណឹងនេះ Chelsea ក៏បានបង្ហាញខ្លួនចូលចរចា បន្ទាប់ពីមើលឃើញថាខ្សែប្រយុទ្ធវ័យ៣២ឆ្នាំ នៅសល់កុងត្រាតែ៦ខែទៀតប៉ុណ្ណោះជាមួយ Napoli។
បច្ចុប្បន្នលោក Lampard កំពុងតាមប្រមាញ់ចុះកុងត្រាយកកីឡាករថ្មីៗមកពង្រឹងក្រុម ជាពិសេសកីឡាករដែលលេងនៅតំបន់ប្រយុទ្ធក្រោយបាត់បង់កីឡាករឆ្នើម Eden Hazard ទៅក្នុងដៃ Real Madrid កាលពីទីផ្សារដោះដូររដូវក្ដៅឆ្នាំមុន។
គួរឲ្យដឹងដែរថា ក្រៅពីក្រុមតោខៀវ Chelsea ខ្សែប្រយុទ្ធសញ្ជាតិប៊ែលហ្សិករូបនេះ ក៏ទទួលបានសំណើរពីក្លិប Inter Milan ផងដែរ៕