អាមេរិក៖ យុវជន Wolf Cukier អាយុ១៧ឆ្នាំជាសិស្សមកពីវិទ្យាល័យ Scarsdale ក្នុងទីក្រុងញូវយ៉ក ដែលបានរកឃើញភពថ្មីមួយនៅអំឡុងពេលចុះកម្មសិក្សានៅអង្គការណាសា។ កាលពីរដូវក្ដៅកន្លងទៅ Cukier បានចុះកម្មសិក្សានៅមជ្ឈមណ្ឌលហោះហើរអវកាស Goddard របស់អង្គការណាសា ហើយកិច្ចការដែលយុវជននេះត្រូវធ្វើដំបូងគេគឺការស្វែងរកភពក្រៅប្រព័ន្ធព្រះអាទិត្យតាមរយៈកែវយឹតអវកាសរបស់ផ្កាយរណប TESS (Transiting Exoplanet Survey Satellite)។

យុវជន Wolf Cukier

រយៈពេលបីថ្ងៃជាមួយបេសកកម្មមួយនេះ យុវជនរូបនេះបានឆ្លុះឃើញប្រព័ន្ធផ្កាយ TOI 1338 ដែលមានចម្ងាយ១,៣០០ឆ្នាំពន្លឺពីផែនដី ហើយពេលនោះ Cukier បានឃើញអ្វីមួយដែលកំពុងស្ថិតនៅលើគន្លងផ្កាយពីរដួងនិងបានឆ្លងកាត់ពន្លឺរបស់ពួកវា។ យុវជនរូបនេះបានកត់សម្គាល់ ហើយបានប្រាប់រឿងនេះទៅប្រធានរបស់ខ្លួនអំពីព័ត៌មានដែលខ្លួនទើបរកឃើញ។ បន្ទាប់ពីនោះមក ពួកគេបានចាប់ផ្ដើមបើកការស្រាវជ្រាវមួយដែលចំណាយពេលអស់ជាច្រើនសប្ដាហ៍ ហើយជាលទ្ធផល Cukier បានរកឃើញភពមួយដែលមានទំហំធំជាងផែនដីរបស់យើង៦.៩ដង។ បើតាមការរាយការណ៍របស់សារព័ត៌មាន CBS បានឲ្យដឹងថាវាជាភពមួយដែលវិលជុំវិញតារាភ្លោះ ហើយគេពិបាកមើលវាណាស់។

ភពដែលរកឃើញដោយ  Cukier កំពុងវិលជុំវិញតារាភ្លោះ

Cukier បានលាក់ការសម្ងាត់មួយនេះរហូតមកដល់សប្ដាហ៍នេះ ទើបត្រូវបានគេលើកយកមកពិភាក្សានៅកិច្ចប្រជុំលើកទី២៣៥នៃសមាគមតារាវិទូអាមេរិកក្នុងទីក្រុងហូណូលូលូ។ Cukier បាននិយាយថានេះគ្រាន់តែជាជំហានដំបូងនៃការចាប់ផ្ដើមសិក្សាពីតារា ហើយយុវជនរូបនេះគ្រោងនឹងសិក្សាជំនាញរូបវិទ្យាឬរូបវិទ្យាអវកាសនៅមហាវិទ្យាល័យក្នុងឆ្នាំក្រោយ៕

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 098282890 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក បច្ចេកវិទ្យា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]