លេងសើចម៉េចបាន! នៅថៃ ឥឡូវអាចប្រគេនចង្ហាន់ព្រះសង្ឃដោយមិនបាច់ទៅដល់វត្ត និងទទួលពរវិញតាមវីដេអូខល

ថៃ៖ ​​​​​​​​វិស័យបច្ចេកវិទ្យាកាន់តែរីកចម្រើន ពីមួយថ្ងៃទៅមួយថ្ងៃជាលំដាប់ នឹងជាយានមួយ ជួយដោះស្រាយបញ្ហា និងជួយពន្លឿនរាល់ការងារជាច្រើនដល់មនុស្ស។

ទន្ទឹមនឹងភាពរីកចម្រើនឥតឈប់ឈរ​ នៃបចេ្ចកវិទ្យាសព្វថ្ងៃ ក៏ស្រាប់តែមានព្រះសង្ឃមួយអង្គព្រះនាម ស៊ូវីរ៉ាវ៉ារ៉ាវ៉ាត់ ធ្វើឲ្យអ្នកប្រើប្រាស់បណ្ដាញសង្គមជាច្រើនចាប់អារម្មណ៍ ក្រោយព្រះអង្គបានបង្ហោះសារមួយនៅលើទំព័រហ្វេសប៊ុក ដោយប្រាប់ទៅប្រជាជនថា៖     “ អ្នកទាំងគ្នាមិនចាំបាច់ មកប្រគេនចង្ហាន់ព្រះសង្ឃ ដល់វត្តអារាមក៏បានដែរ ” ។

បើយោងតាមសេចក្ដីរាយការណ៍មួយ ពុទ្ធសាសនិកមិនបាច់យកតង្វាយមកថ្វាយដល់វត្តក៏បានដែរ គ្រាន់តែធ្វើការកុម៉្មង់ ហើយឲ្យគេដឹកឲ្យព្រះសង្ឃដល់វត្តអារាមជាការស្រេច ហើយព្រះសង្ឃនឹងធ្វើការឲ្យពរវិញតាមវីដេអូខល។

ព្រះសង្ឃដែលមានព្រះជន្ម ៦៣ ព្រះវស្សា គង់នៅវត្ត ត្រាងនីកំ ប្រាថេម ខេត្តត្រាង ប្រទេសថៃខាងលើបានបង្កឲ្យមានភាពងាយស្រួលដល់ពុទ្ធសាសនិកដូចនេះក្ដី ក៏មានអ្នកមួយចំនួនបានរិះគន់ព្រះអង្គថា បានបង្កើតឲ្យអ្នកគោរពបូជាខ្ចិលច្រអូស ដែលវាខុសទៅនឹងទំនៀមទំលាប់ព្រះពុទ្ធសាសនា។ ទោះជាយ៉ាងណាក្ដី ក៏ព្រះអង្គនៅតែប្រកាន់ជំហរយ៉ាងមុតមាំថា នេះគឺជាការសម្របខ្លួនជាមួយនឹងបច្ចេកវិទ្យាសព្វថ្ងៃ ហើយអាចឲ្យមនុស្សធ្វើបុណ្យ ដោយប្រើប្រាស់បច្ចេកវិទ្យាតែប៉ុណ្ណោះ។ ព្រះអង្គបានបន្តថា យើងសព្វថ្ងៃកំពុងរស់នៅក្នុងយុគសម័យមួយ ដែលប្រជាជនអាចធ្វើតង្វាយដោយមិនចាំបាច់ឃើញមុខគ្នា។

ទន្ទឹមនឹងនេះ មានមតិមួយចំនួនក៏បានសម្ដែងការគាំទ្រនូវគំនិតមួយនេះដែរ ហើយព្រមទាំងបាននិយាយលេងសើចថា ផ្ញើវិក័យប័ត្រទៅព្រះសង្ឃមុន ទើបអាចទទួលបានពរតាមក្រោយ៕