រថយន្តដឹកទំនិញធុនធំ បុកម៉ូតូវ៉េវនៅលើស្ពានលីយ៉ុងផាត់ បែកក្បាលស្លាប់ម្នាក់

រាជធានីភ្នំពេញ ៖ បុរសម្នាក់បានស្លាប់ នៅលើស្ពានលីយ៉ុងផាត់ (ស្ពានព្រែកព្នៅ) ខណៈកំពុងជិះម៉ូតូឆ្លងស្ពាន ត្រូវរថយន្តដឹកទំនិញបើកទៅបុក ចំពីមុខពេញទំហឹង ចំណែករថយន្តបង្កបើករត់គេចបាត់ ។ គ្រោះថ្នាក់នេះកើតឡើង កាលពីវេលាម៉ោង៦ និង៤០នាទីយប់ថ្ងៃទី១៧ មីនា នៅលើស្ពានលីយ៉ុងផាត់ ស្ថិតក្នុងភូមិឡកំបោរ សង្កាត់ស្វាយប៉ាក ខណ្ឌឫស្សីកែវ ។

ប្រភពព័ត៌មានបានឱ្យដឹងថា មុនពេលកើតហេតុជនរងគ្រោះជិះម៉ូតូវ៉េវចិន ពណ៌ក្រហម ឆ្លងស្ពានពីកើតទៅលិច ចំណែករថយន្តដឹកទំនិញជាប្រភេទ រថយន្តធុនធំបើកឆ្លងស្ពានពីលិចទៅកើត ក្នុងទិសដៅបញ្ច្រាសទិសគ្នាបានបើកទៅ បុកម៉ូតូចំពីមុខពេញទំហឹង បណ្តាលឱ្យជនរងគ្រោះបែកក្បាល ហូរឈាមស្លាប់នៅនឹងកន្លែង ។

ជនរងគ្រោះឈ្មោះហង្ស សៅរ៍ ភេទប្រុស អាយុ៣១ឆ្នាំ ស្នាក់នៅភូមិទួលចារ ខណ្ឌសែនសុខ មានស្រុកកំណើតនៅភូមិក្រឡាញ់ ឃុំសន្តិសុខ ស្រុកក្រឡាញ់ ខេត្តសៀមរាប ។ បើតាមសម្តីម្តាយរបស់ជនរងគ្រោះបានយំរៀបរាប់ថា គ្រោះថ្នាក់ចរាចរណ៍សាហាវណាស់ ក្នុងរយៈពេល៥ខែប៉ុណ្ណោះ កូនប្រុសរបស់គាត់ស្លាប់ដោយសារគ្រោះថ្នាក់ចរាចរណ៍អស់២នាក់ហើយ ៕

បញ្ចូលអត្ថបទ ៖ បុប្ផា កោះ

ផ្តល់សិទ្ធដោយ កោះសន្តិភាព