ព័រទុយហ្កាល់៖ អ្នកគាំទ្រក្រុម Benfica លោក Duarte Mendes បានគោរពនូវពាក្យសន្យារបស់ខ្លួន ដោយថតវីដេអូរត់អាក្រាតកាយចម្ងាយ១គីឡូម៉ែត បន្ទាប់ពីក្លិបសម្រេចកិច្ចព្រមព្រៀងចុះកុងត្រាយកខ្សែបម្រើកណ្ដាលរបស់ក្លិប Borussia Dortmund កីឡាករ Julian Weigl។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សអ្នកគាំទ្រចិត្តសឿងរូបនេះ បានបង្ហោះសារមួយឃ្លានៅលើបណ្ដាញសង្គម Twitter របស់ខ្លួន កាលពីថ្ងៃទី១៨ ខែធ្នូ ឆ្នាំ២០១៩ ដោយសរសេរថា៖
"ប្រសិនបើកីឡាករ Weigl ព្រមផ្ទេរមក Benfica ខ្ញុំនឹងរត់ស្រាត ១គីឡូម៉ែត្រនៅលើផ្លូវ។"
ក្រោយបង្ហោះសារនេះរួច មិនបានប៉ុន្មាន នៅថ្ងៃទី១ខែមករា ឆ្នាំ២០២០ ក្លិប Benfica ក៏បានប្រកាសសម្រេចកិច្ចព្រមព្រៀងចុះកុងត្រាយកកីឡាករ Weigl ក្នុងតម្លៃ ១៦.៩លានផោន ជាមួយកុងត្រារយៈពេល៤ឆ្នាំកន្លះ។
ក្រោយចុះកុងត្រាចូលរួមជាមួយ Benfica ខ្សែបម្រើវ័យ២៤ឆ្នាំ Weigl បានបង្ហោះនៅលើ Twitter របស់គាត់ដោយឆ្លើយតបនឹងការសន្យារបស់អ្នកគាំទ្រខាងលើលក្ខណៈលេងសើចថា “រត់ទៅ”។
យ៉ាងណាអ្នកគាំទ្ររូបនោះ ក៏មិនបានក្បត់ពាក្យសន្យារបស់ខ្លួនដែរ ដោយគាត់ពិតជាបានរត់នឹងថតវីដអូពិតមែន ជាក់ស្ដែងក្នុងវីដេអូនោះគាត់បាននិយាយថា៖
"សួស្ដី ព័រទុយហ្កាល់ ខ្ញុំឈ្មោះ Duarte Mendes ដូចដែលអ្នកបានដឹងហើយ កាលពីថ្ងៃ១៧ ខែធ្នូ ខ្ញុំបានសរសេរលើ Twitter ថា ប្រសិនបើ Weigl មក Benfica ខ្ញុំនឹងរត់ស្រាត១គីឡូម៉ែត្រ ហើយថ្ងៃនេះ ខ្ញុំមកធ្វើតាមការសន្យាហើយ។"
លោក Mendes បាននិយាយទៀតថា៖
"ខ្ញុំរត់ហត់បន្តិចមែនតែខ្ញុំសប្យាយចិត្ត ព្រោះក្ដីស្រម៉ៃរបស់ខ្ញុំបានសម្រេចហើយ។ ខ្ញុំបានរក្សាការសន្យាខ្ញុំរួចរាល់ហើយ ហើយពេលនេះជាពេលវេលាដែលត្រូវរីករាយម្ដង។ អារម្មណ៍នេះពិតជាអស្ចារ្យណាស់។ ជូនចំពោះ Weigl ខ្ញុំស្រឡាញ់អ្នក។ ខ្ញុំសង្ឃឹមថាអ្នកនឹងទទួលជោគជ័យនៅ Benfica។ ប្រសិនជាអាចខ្ញុំចង់បានឯកសណ្ឋាន Benfica មួយដែលមានសញ្ញេរបស់អ្នក និងចង់ឱបអ្នក។"
ក្រោយមើលឃើញពីការគោរពសម្ដីរបស់លោក Mendes កីឡាករ Weigl បានបង្ហោះនៅលើ Twitter របស់គាត់ឆ្លើយតបវិញថា “អ្នកនឹងទទួលបានអាវរបស់ខ្ញុំ”៕
ប្រភព៖ AF
Bong I.T