អាមេរិក៖ ក្រុមហ៊ុន Manta5 បានដាក់បង្ហាញកង់អគ្គិសនីថ្មីមួយនៅឯសន្និសីទបច្ចេកវិទ្យា CES ក្នុងរដ្ឋឡាសវេហ្គាស ដែលយើងអាចជិះវានៅលើទឹកបាន។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
កង់នេះមានឈ្មោះថា Manta5 Hydrofoil eBike មានលក្ខណៈពិសេសរបស់វាគឺផលិតពីសារធាតុអាលុយមីញ៉ូមនិងដែកអ៊ីណុក វាមានបំពាក់ម៉ូទ័រកម្លាំង ៤៦០វ៉ាត់។ យើងអាចជិះវាសំរាប់ជាការកំសាន្តឬហាត់ប្រាណ ហើយជាពិសេសប្រសិនបើខ្ចិលធាក់វា អ្នកអាចបើកម៉ូទ័រជំនួសបាន ដែលមើលទៅប្រៀបដូចជាជិះម៉ូតូលើទឹកដូច្នោះដែរ ។
កង់នេះសរុបមានទម្ងន់ ២០គីឡូក្រាម និងអាចធ្វើការដោះចេញជាបំណែកៗនឹងងាយស្រួលដាក់តាមរថយន្ត ។ កង់នេះត្រូវបានរចនាឡើងសម្រាប់អ្នកជិះមានទម្ងន់ខ្លួនចាប់ពី ៧០ ទៅ ១០០គីឡូក្រាម ហើយអាចជិះលើទឹកបាន មិនថាទឹកសមុទ្រឬទឹកទន្លេ។
លោក Greg Johnston នាយកប្រតិបត្តិនៅក្រុមហ៊ុន Manta បាននិយាយថា“ វាអាចនឹងមានការលំបាកបន្តិចនៅពេលចាប់ផ្តើមជិះដំបូង ប៉ុន្តែនៅពេលដែលអ្នកចេះជិះហើយ អ្នកប្រហែលជាមិនចង់ឈប់ទេ”។
តែអ្វីដែលគួរឱ្យភ្ញាក់ផ្អើលបំផុតគឺថា eBike នេះមិនថោកឡើយ ដោយតម្លៃចាប់ផ្តើមពី៦,០០០ ទៅ ៨,០០០ដុល្លារ។ ទោះយ៉ាងណាក៏ដោយ ប្រសិនបើលោកអ្នកមិនអាចបញ្ឈប់ចិត្តស្រឡាញ់កង់នេះបានទេ លោកអ្នកអាចធ្វើបញ្ជាទិញ សំរាប់ការដឹកជញ្ជូនគឺរំពឹងថានឹងមកដល់នៅខែមិថុនា ឆ្នាំ ២០២០ ៕
Bong I.T