អូស្រ្តាលី៖ កាលពីយប់មិញតារាសម្តែងជនជាតិអូស្ត្រាលីលោក Chris Hemsworth ដែលរស់នៅទីក្រុង Byron Bay ក្នុងរដ្ឋញូវសៅវែល បានប្រកាសថា លោកនឹងចូលរួមវិភាគទានចំនួន ១លានដុល្លារ ដល់កិច្ចខិតខំប្រឹងប្រែងជួយសង្គ្រោះក្នុងហេតុការណ៍អគ្គិភ័យដែលបានបំផ្លិចបំផ្លាញតំបន់
ភាគអាគ្នេយ៍នៃប្រទេសអូស្ត្រាលី ចាប់តាំងពីខែកញ្ញាដោយសារសីតុណ្ហភាពក្តៅខ្លាំង និងគ្រោះរាំងស្ងួតជាច្រើនខែកន្លងមក។
ភ្លើងឆេះព្រៃនៅក្នុងប្រទេសអូស្ត្រាលីបានបន្តបំផ្លាញព្រៃឈើចំនួន ១៥,៦លានហិចតា ដែលជាតំបន់មួយមានទំហំប៉ុនរដ្ឋ West Virginia ក្នុងនោះមានមនុស្សចំនួន ២២នាក់បានស្លាប់ ហើយផ្ទះសម្បែងប្រជាជនជាង ១,៣០០ ខ្នង ត្រូវបានបំផ្លាញនៅក្នុងរដ្ឋរដ្ឋញូវសៅវែលទាំងមូល ដោយភ្លើងឆេះព្រៃបានរាលដាលយ៉ាងលឿន ប្រហែលពីរដងនៃល្បឿនរបស់មនុស្សធម្មតារត់។
នៅក្នុងវីដេអូមួយនៅលើគណនីបណ្តាញសង្គមរបស់លោក Hemsworth គាត់បានស្នើសុំឱ្យអ្នកគាំទ្រជួយចូលរួមបន្ថែម ។ គាត់ក៏បានបង្កើតគេហទំព័រសម្រាប់ការបរិច្ចាគ ដែលទាក់ទងជាមួយអង្គការមិនរកប្រាក់ចំណេញនិងអង្គការអន្តរជាតិដែលផ្តល់ជំនួយដល់ប្រទេសផងដែរ។
គួររម្លឹកថា ភ្លើងឆេះព្រៃបានផ្ទុះឡើងនៅទូទាំងប្រទេសអូស្ត្រាលីជារៀងរាល់ឆ្នាំ តែទោះយ៉ាងណានៅឆ្នាំនេះភ្លើងឆេះព្រៃបានបំផ្លិចបំផ្លាញសម្បត្តិធម្មជាតិនិងផ្ទះសម្បែងរបស់ប្រជាជនរួមទាំងហេដ្ឋារចនាសម្ព័ន្ធជាច្រើនទៀត ដែលមិនធ្លាប់មានក្នុងប្រវត្តិសាស្ត្រ៕