គ្រូបង្វឹកជោគជ័យមួយរូប ចង់មកដណ្ដើមកៅអីរបស់ Ole Gunnar Solskjaer ដឹកនាំ Man UTD

អង់គ្លេស៖ អតីតអ្នកចាត់ការទូទៅរបស់ Juventus លោក Massimiliano Allegri បានសម្លឹងឃើញក្នុងការមកដឹកនាំក្លិបបិសាចក្រហម Manchester United ដោយរជ្ជកាលដឹកនាំរបស់អ្នកចាត់ការទូទៅបច្ចុប្បន្នលោក Ole Gunnar Solskjaer អាចនឹងត្រូវបិទបញ្ចប់នៅពេលខាងមុខ។

បុរសសញ្ជាតិអ៊ីតាលីវ័យ ៥២ឆ្នាំបានចាកចេញពីក្លិបសេះបង្កង់ Juventus កាលពីរដូវក្ដៅកន្លងទៅ ក្រោយជួយឲ្យក្លិបមានមូលដ្ឋាននៅទីក្រុង Turin ឈ្នះពានលីគកំពូលអ៊ីតាលី Serie A ៥សម័យកាល។ លោក Massimiliano Allegri សម្រេចចែកផ្លូវគ្នាជាមួយ Juventus ក្រោមហេតុផលដើម្បីស្វែងរកការប្រកួតប្រជែងថ្មី។ កាលពីខែមុនលោកក៏ជាគោលដៅមួយសំខាន់របស់ Arsenal ផងដែរក្រោយក្លិបកាំភ្លើងធំបានបណ្ដេញលោក Unai Emery ចេញពីតំណែង និងស្វែងរកអ្នកជំនួសថ្មី។ យ៉ាងណាមិញ លោក Mikel Arteta ជាអ្នកទទួលរ៉ាប់រងភារកិច្ចនេះ។

ងាកមកមើលលោក Ole Gunnar Solskjaer វិញហាក់មិនគិតច្រើនទៅលើបញ្ហាតំណែងនោះទេ ប៉ុន្តែការប្រកួតដែល Man UTD ចាញ់ Man City កាលពីថ្ងៃអង្គារកន្លងទៅក្នុងវគ្គពាក់កណ្ដាលផ្ដាច់ព្រ័ត្រជើងទី១ពានរង្វាន់ EFL Cup បុរសសញ្ជាតិន័រវែសបាននិយាយថាទម្រង់លេងរបស់ក្រុមនៅវគ្គទី១ ក្នុងការប្រកួតនោះគឺជាទម្រង់លេងដែលអាក្រក់បំផុតនៅរដូវកាលនេះ។ Man UTD ឈ្នះបានត្រឹមតែ២ប្រកួតប៉ុណ្ណោះ នៅក្នុងការប្រកួត៦ប្រកួតចុងក្រោយ។ ហេតុផលទាំងអស់នេះហើយ ដែលបានធ្វើឲ្យកៅអីរបស់លោក Ole Gunnar Solskjaer កំពុងតែមានកម្ដៅយ៉ាងខ្លាំង។

គួរឲ្យដឹងដែរថា Allegri គឺជាអ្នកចាត់ការទូទៅមួយរូបដែលមានបទពិសោធន៍ជោគជាំជាមួយក្លិបនៅអ៊ីតាលី ហើយលោកក៏ជាបេក្ខភាពមួយលេចធ្លោដែលអាចធ្វើដំណើរមកកាន់កីឡដ្ឋាន Old Trafford បើសិនជាលោក Ole Gunnar Solskjaer ត្រូវចាកចេញ៕

ប្រភព៖ DailyMail