តោះមកដឹងពីលក្ខណៈសម្បត្តិរបស់យន្តហោះគ្មានមនុស្សបើកដែលអាមេរិកប្រើសម្រាប់ធ្វើឃាតមេបញ្ជាការជាន់ខ្ពស់របស់អ៊ីរ៉ង់

អាមេរិក៖ នៅថ្ងៃទី៣ ខែមករា ឆ្នាំ២០២០ ប្រធានាធិបតីអាមេរិកលោកដូណាល់ត្រាំបានបញ្ជាឲ្យប្រើប្រាស់យន្តហោះគ្មានមនុស្សបើក MQ-9 Reaper ដើម្បីធ្វើឃាតមេបញ្ជាការជាន់ខ្ពស់របស់អ៊ីរ៉ង់គឺលោក កាសេម​ សូឡីម៉ានី។ MQ-9 មានតម្លៃរហូតទៅដល់៦៤លានដុល្លារ ហើយវាត្រូវបានគេចាត់ទុកថាជាយន្តហោះគ្មានមនុស្សបើកដែលមានគ្រោះថ្នាក់បំផុតនៅលើមេឃ។ MQ-9 Reaper ត្រូវបានបំពាក់ដោយប្រព័ន្ធកំណត់ទិសដៅយ៉ាងច្រើនដែលអាចឲ្យវាទទួលបាននិងតាមដានគោលដៅពីចម្ងាយឆ្ងាយ។

មុន១០ទៅ១៥នាទី យន្តហោះគ្មានមនុស្សបើកមួយនេះទំនងជាបានតាមដានពីក្បួនរថយន្តយោធារបស់លោក សូឡីម៉ានី មុនការវាយប្រហារបានចាប់ផ្ដើម។ នៅពេលវាកំពុងស្ថិតនៅក្នុងការវាយប្រហារ យន្តហោះមួយនេះបានកំណត់គោលដៅរួចជាស្រេច ដោយវាដឹងថាលោក សូឡីម៉ានី កំពុងអង្គុយនៅកន្លែងណាក្នុងរថយន្ត។

ប្រតិបត្តិករ (មនុស្ស) អាចចាំអង្កេតមើលហេតុការណ៍ពីមជ្ឈមណ្ឌលបញ្ជារាប់រយ ឬរាប់ពាន់គីឡូម៉ែត្រ ហើយអាចបញ្ជាយន្តហោះនោះតាមដានមុខសញ្ញាបានយ៉ាងស្ងៀមស្ងាត់។ ទីបំផុតពួកគេអាចកំណត់គោលដៅដែលត្រូវបញ្ជា ហើយមីស៊ីលកំពុងរង់ចាំការបញ្ជាក់ចុងក្រោយដើម្បីបាញ់កម្ទេចគោលដៅក្បួនរថយន្តលោក សូឡីម៉ានី។ វាត្រូវការពេល ១.២វិនាទីប៉ុណ្ណោះសម្រាប់ការបញ្ជារបស់ប្រតិបត្តិករ ដើម្បីតភ្ជាប់ទៅយន្តហោះដែលគ្មានមនុស្សបើក។

យន្តហោះពិឃាតមួយនេះបានភ្ជាប់មកនូវឃ្លាំងអាវុធដែលអាចត្រូវបានប្រើទៅតាមគោលបំណងផ្សេងៗ។ ក្នុងចំណោមអាវុធដែលវាផ្ទុកមានដូចជាគ្រាប់ផ្លោងកំណត់គោលដៅតាមឡាស៊ែរ GBU-12 Paveway II កាំជ្រួចមីស៊ីល AGM-114 Hellfire II មីស៊ីលបាញ់ពីលើអាកាសដល់ដី AIM-9 Sidewinder និងគ្រាប់ផ្លោងជាចង្កោម GBU-38។ MQ-9 អាចហោះបានរហូតដល់ទៅ១៤ម៉ោងនិងមានល្បឿនដល់ទៅ៤៨២គីឡូម៉ែត្រក្នុងមួយម៉ោង។ មិនតែប៉ុណ្ណោះវាមានសមត្ថភាពអាចចាប់យកគោលដៅដូចជារថពាសដែក យន្តហោះ និងនាវាជាដើម៕