អស្ចារ្យណាស់! គ្រួសារមួយអាចជួយសង្គ្រោះជីវិតសត្វជាង ៩០,០០០ ក្បាលកំឡុងពេលភ្លើងឆេះព្រៃនៅអូស្ត្រាលី

អូស្រ្តាលី៖ បញ្ហាភ្លើងឆេះព្រៃយ៉ាងធ្ងន់ធ្ងរនៅប្រទេសអូស្ត្រាលី បានបណ្ដាលឲ្យបាត់បង់ព្រៃឈើយ៉ាងច្រើន ហើយអ្វីដែលកាន់តែគួរឲ្យសោកស្ដាយទៀតនោះ គឺជីវិតសត្វព្រៃជាច្រើនបានស្លាប់ផងដែរ។

ក្នុងគ្រាដ៏អាក្រក់បែបនេះគ្រួសារ Irwin បានស្ម័គ្រចិត្តជួយសង្គ្រោះជីវិតសត្វព្រៃដែលរបួសដោយសារភ្លើងឆេះព្រៃ។ យោងតាមលោក Anderson Cooper បានឲ្យដឹងថាគ្រួសារ Irwin ជាអ្នកដែលបានសង្គ្រោះ និងព្យាបាលសត្វមួយចំនួនធំដែលរងរបួសកំឡុងពេលដែលប្រទេសអូស្ត្រាលីទទួលរងគ្រោះមហន្ដរាយភ្លើងឆេះព្រៃ ហើយរហូតមកដល់ពេលនេះមានសត្វជាង ៩០,០០០ ក្បាលហើយដែលពួកគេបានជួយសង្គ្រោះ។

គួរបញ្ជាក់ថា ដោយសារបញ្ហាអាកាសធាតុ និងគ្រោះរាំងស្ងួត ប្រទេសអូស្ត្រាលីត្រូវបានអគ្គិភ័យឆាបឆេះចាប់តាំងពីខែកញ្ញាមក លើផ្ទៃដីរាប់លានហិកតា ហើយយ៉ាងហោចណាស់មានមនុស្ស ២៤ នាក់បានស្លាប់បាត់បង់ជីវិត ព្រមទាំងបំផ្លាញផ្ទះជាង ២០០០ ខ្នង  និងសត្វព្រៃជាង ៥០០ លានក្បាល៕