ក្រសួងសាធារណៈការ និងដឹកជញ្ជូន ថ្មីៗនេះ បានប្រកាសបើកឲ្យដំណើរការ ការចុះបញ្ជីស្លាកលេខពិសេសផ្ទាល់ខ្លួនសម្រាប់រថយន្ត ដោយមានតម្លៃចាប់ពី២លានរៀល ឬ ៥០០ដុល្លារអាមេរិកឡើងទៅ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សយ៉ាងណាអ្នកប្រើប្រាស់បណ្តាញសង្គមបានបង្ហោះព្រោងព្រាតលើប្រព័ន្ធអ៊ីនធឺណែតថា ការចុះឈ្មោះខ្លះមានតម្លៃថ្លៃហួសដល់រាប់ម៉ឺនដុល្លារ ហើយក្រៅពីនេះបានរិះគន់ក្រសួងថា ការធ្វើបែបហាក់បីដូចជាចង់គាបសង្កត់ញើសឈាមពលរដ្ឋ។
តបនឹងមតិរិះគន់ចំៗពីសំណាក់អ្នកទាំងនោះ អ្នកនាំពាក្យក្រសួងសាធារណៈការ និងដឹកជញ្ជួន លោក វ៉ា ស៊ឹមសូរិយា បានប្រាប់Khmerloadនៅថ្ងៃ០៨ មករានេះថា ការដាក់ឲ្យដំណើរការ ការចុះបញ្ជីស្លាកលេខពិសេសនេះ គឺឆ្លើយតបទៅតាមសំណូមពររបស់ប្រជាពលរដ្ឋដែលចង់បានលេខពីសេសៗប៉ុណ្ណោះ។
លោកបញ្ជាក់យ៉ាងច្បាស់ៗថា៖«មូលហេតុដែលក្រសួងនឹកឃើញវិធីសាស្ត្រចេញស្លាកលេខពិសេសនេះ គឺដោយយោងលើការស្ទង់មតិដែលបង្ហាញថា ពលរដ្ឋដែលមានជីវភាពធូធារ ឬអ្នកស៊ីវិល័យ ជាច្រើនចង់បានស្លាកលេខពិសេសនេះ។ អាជ្ញាធរមិនបានបង្ខំម្ចាស់រថយន្តគ្រប់រូប ឲ្យប្រើស្លាកពិសេសដែលគេកំពុងដេញថ្លៃនោះឯណា ការពិតក្រសួងធ្វើតម្រូវតាមសំណូមពរអ្នកចង់បានទេតើ។ អ្នកដែលចង់បានក៏ចុះបញ្ជីទៅ ចំណែកអ្នកមិនចង់បានអាចប្រើស្លាកលេខធម្មតាដែលមានស្រាប់បាន អ៊ឹចឹងហើយកុំបន្ទោសក្រសួងថាចង់បានលុយ។»
អ្នកនាំពាក្យរូបនេះបង្ហើបថា ការដេញថ្លៃលើឈ្មោះពិសេស នឹងមិនមានការជាន់គ្នាឡើយព្រោះបុគ្គលណាហ៊ានឡើងថ្លៃខ្ពស់ជាងគេ បុគ្គលនោះនឹងទទួលបានស្លាកលេខនោះ។ លោកថា វាមានភាពយុត្តិធម៌ហើយដែលមានការដេញថ្លៃ ហើយមិនមែនមានតែខ្មែរទេដែលធ្វើបែបនោះ សូម្បីនៅប្រទេសថៃក៏មានដែរ។ ម្យ៉ាងទៀត រដ្ឋក៏អាចលក់ស្លាកលេខនេះបានតម្លៃខ្ពស់ដើម្បីប្រមូលចំណូលចូលរដ្ឋផងដែរ។
សូមបញ្ជាក់ថា សម្រាប់តម្លៃនៃស្លាកលេខពិសេសនេះ គឺម្ចាស់រថយន្តអាចបញ្ជាទិញដោយដាក់ឈ្មោះផ្ទាល់ខ្លួន ឬឈ្មោះពិសេសណាមួយសម្រាប់សំគាល់អត្តសញ្ញាណខ្លួនឯង ហើយនៅពេលលក់រថយន្តឬប្តូរម្ចាស់កម្មសិទ្ធិ គឺអាចដកហូតស្លាកលេខនោះចេញដោយរក្សាទុកប្រើផ្ទាល់ខ្លួនអស់មួយជីវិត៕