រកឃើញសំបុកផ្កាយក្មេងៗយ៉ាងធំនៅក្នុងកាឡាក់ស៊ីមីលគីវ៉េ

បរទេស៖ ក្រុមតារាវិទូបានរកឃើញសម្ព័ន្ធតារាដ៏ធំមួយនៅក្នុងកាឡាក់ស៊ីរបស់យើងដែលបង្កើតឡើងដោយបណ្ដុំកូនផ្កាយដែលជាទីកន្លែងមានផ្ទុកតារាកកើតថ្មីៗជាច្រើន។ បណ្ដុំឧស្ម័នធូលីដ៏វែងនិងស្ដើងទាំងនោះមានប្រវែង៩,០០០ឆ្នាំពន្លឺនិងមានទទឹង៤០០ឆ្នាំពន្លឺ ហើយវាមានចម្ងាយប្រហែល៥០០ឆ្នាំពន្លឺពីព្រះអាទិត្យ។

របកគំហើញថ្មីនេះដែលចុះផ្សាយនិងរៀបរាប់នៅក្នុងទិនានុប្បវត្តិដែលមានចំណងជើងថា Nature បានមកពីការប្រឹងប្រែងធ្វើការរបស់អ្នកស្រាវជ្រាវ ហើយកិច្ចការទាំងនេះអាចនឹងជួយដល់ការរៀបចំផែនទីថ្មីនៃកាឡាក់ស៊ីមីលគីវ៉េ។ ក្រុមអ្នកវិភាគអន្តរជាតិបានប្រើប្រាស់ទិន្នន័យដែលបានមកពីកែវយឹតអវកាសអឺរ៉ុប Gaia ដែលត្រូវបានគេបង្ហោះតាំងពីឆ្នាំ២០១៣។ Gaia ត្រូវបានគេបង្កើតឡើងក្នុងគោលបំណងសម្រាប់វាស់វែងទីតាំង ចម្ងាយ និងចលនារបស់ផ្កាយនៅក្នុងកាឡាក់ស៊ីរបស់យើង។

សមាជិកក្នុងក្រុមអ្នកវិភាគបានប្រើប្រាស់ទិន្នន័យដែលបានពីទីភ្នាក់ងារអវកាសអឺរ៉ុបជាមួយការស្ទាបស្ទង់ដទៃទៀតដើម្បីបង្កើតផែនទី 3D នៃរូបធាតុរបស់តារាក្នុងកាឡាក់ស៊ីមីលគីវ៉េ។ លទ្ធផលថ្មីៗបានកែតម្រូវនូវទស្សនៈមុននៃតំបន់នេះនៅក្នុងកាឡាក់ស៊ីរបស់យើង។ តំបន់បង្កើតផ្កាយជាច្រើនដែលត្រូវបានគេរកឃើញដោយរលក Radcliffe ដោយកាលពីមុនត្រូវបានគេជឿថាវាជាផ្នែកសម្ព័ន្ធមួយនៃក្រវ៉ាត់ Gould ដែលមានទទឹងរហូតដល់៣,០០០ឆ្នាំពន្លឺ៕