អង់គ្លេស៖ ក្រុមបិសាចក្រហម Manchester United ក្នុងនាមជាម្ចាស់ផ្ទះបានបើកទ្វារកីឡដ្ឋាន Old Trafford តតាំងជាមួយក្រុមភ្ញៀវ Manchester City ក្នុងការប្រកួតពានរង្វាន់ EFL Cup វគ្គពាក់កណ្ដាលផ្ដាច់ព្រ័ត្រជើងទី១ ក្រោមក្រសែភ្នែកអ្នកគាំទ្រប្រមាណជិត៧ម៉ឺននាក់ កាលពីរាត្រីថ្ងៃអង្គារម្សិលមិញ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សក្នុងការប្រកួតដ៏ជក់ចិត្តនេះ ក្រុមភ្ញៀវជាអ្នកស៊ុតបើកឆាកនាំមុខមុន៣គ្រាប់ក្នុងតង់ទី១ ដោយគ្រាប់ទី១ ជាការអូសស៊ុតជើងឆ្វេងបានយ៉ាងល្អពីសំណាក់កីឡាករ Bernardo Silva គ្រាប់ទី២ សម្រេចទីដោយខ្សែបម្រើស្លាបសញ្ជាតិអាល់ហ្សេរី Riyard Mahrez និងគ្រាប់ទី៣ ជាការធ្វើឲ្យចូលទីខ្លួនឯងរបស់ខ្សែបម្រើក្រុម Man UTD កីឡាករ Andreas Pereira។
ឈានចូលតង់ទី២ នៅនាទីទី៧០ ក្រុមម្ចាស់ផ្ទះមានឱកាសវាយបកបាន១គ្រាប់វិញ ដោយម្ចាស់អាវលេខ១០ Marcus Rashford តាមរយៈការបញ្ជូនបាល់យ៉ាងល្អពីសំណាក់ខ្សែបម្រើស្លាបវ័យក្មេង Mason Greenwood។
ជំនួបប្រចាំក្រុង Manchester លើកនេះមានការប៉ះទង្គិចគ្នាច្រើនគួរសម ដោយអាជ្ញាកណ្ដាលលោក Michael Dean ចាយកាតលឿងអស់រហូតដល់ទៅ៤សន្លឹក ខណៈស្ថិតិក្នុងការប្រកួតក្រុមទាំងពីរមានឱកាសម្រុកប្រហាក់ប្រហែលគ្នា ដោយក្រុមម្ចាស់ផ្ទះស៊ុតបាន១១ជើង ចំគោលដៅ៣ដង ចំណែកឯក្រុមភ្ញៀវ ស៊ុតបាន២០ជើង ចំគោលដៅ៥ដង។
ដូច្នេះក្រោយបញ្ចប់៩០នាទី ក្រុមបិសាចក្រហម Manchester United បានបរាជ័យក្នុងដីក្រោមថ្វីជើងក្រុមភ្ញៀវមេឃខៀវ Manchester City ក្នុងលទ្ធផល ១-៣។
គួរបញ្ជាក់ផងដែរថា សម្រាប់ការប្រកួតជើងទី២ ពានរង្វាន់ EFL Cup វគ្គពាក់កណ្ដាលផ្ដាច់ព្រ័ត្ររវាងក្រុមទាំងពីរ នឹងធ្វើឡើងនៅថ្ងៃទី ២៩ ខែមករា ឆ្នាំ២០២០ នៅកីឡដ្ឋាន Etihad Stadium៕
បើចង់ឃើញការស៊ុតបញ្ចូលទីគ្នាអស្ចារ្យយ៉ាងណានោះ សូមទស្សនាវីដេអូខាងក្រោម៖