ភ្លើងឆេះព្រៃក្នុងប្រទេសអូស្ត្រាលី៖ តើគេអាចដឹងចំនួនសត្វដែលស្លាប់បានដោយរបៀបណា?

អូស្ត្រាលី៖ កាលពីពេលថ្មីៗនេះមានរបាយការណ៍មួយបានបង្ហាញថាសត្វចំនួនជិតកន្លះប៊ីលាន (៤៨០លាន) បានស្លាប់ដោយសារភ្លើងឆេះព្រៃក្នុងប្រទេសអូស្ត្រាលី។ ចំនួនតួលេខនេះបានមកពីសាស្ត្រាចារ្យ Chris Dickman ដែលជាអ្នកជំនាញខាងជីវចម្រុះអូស្ត្រាលីនៅសាកលវិទ្យាល័យស៊ីដនី។ គាត់បានចេញសេចក្ដីថ្លែងការណ៍មួយដើម្បីពន្យល់ពីរបៀបដែលគាត់អាចឈានដល់ចំណុចនៃការកំណត់តួលេខ ប៉ុន្តែសេចក្ដីថ្លែងការណ៍បានសំដៅទៅលើចំនួនសត្វដែលរងផលប៉ះពាល់ជាជាងសត្វដែលបានស្លាប់ដោយសារអគ្គិភ័យ (បើទោះបីជាចំណងជើងបានដាក់ថាសត្វចំនួន៤៨០លានត្រូវបានស្លាប់)។

ចំនួនខាងលើនេះបានផ្អែកលើរបាយការណ៍ដែលលោកបានសរសេរក្នុងឆ្នាំ២០០៧សម្រាប់ អង្គការមូលនិធិសកលសម្រាប់អភិរក្សធនធានធម្មជាតិ (WWF) ស្ដីពីផលប៉ះពាល់នៃការឈូសឆាយដីលើតំបន់សត្វព្រៃអូស្ត្រាលីនៅក្នុងរដ្ឋ New South Wales។ គេអាចប៉ាន់ប្រមាណបានថាបើជាមធ្យមថនិកសត្វមានចំនួន១៧.៥ សត្វបក្សី២០.៧ និងសត្វល្មូន១២៩.៥ក្នុង១ហិកតា (១០,០០០ម៉ែត្រការ៉េ) ដូច្នេះ១០០ម៉ែត្រការ៉េនៅសងខាងគឺមានទំហំប៉ុនទីលានបាល់ឱប។ បន្ទាប់មកពួកគេបានគុណចំនួនដីដែលរងគ្រោះនិងខូចខាតដោយសារអគ្គិភ័យ។

គេបានប៉ាន់ប្រមាណថានៅលើផ្ទៃដី៣លានហិកតានៃរដ្ឋ New South Wales តែឯងដែលត្រូវបានភ្លើងឆេះរយៈពេលប្រមាណ១០ថ្ងៃមុន អាចមានថនិកសត្វ បក្សី និងល្មូនដល់ទៅ៤៨០លានក្បាលបានរងផលប៉ះពាល់ពីអគ្គិភ័យនេះ។ មានចំណុចដែលគួរឲ្យចាប់អារម្មណ៍ក្នុងតួលេខទាំងនេះ។ ទីមួយការប៉ាន់ស្មានមួយនេះគឺសម្រាប់តែការខូចខាតក្នុងរដ្ឋ New South Wales ហើយឥឡូវភ្លើងបានរាលដាលដល់រដ្ឋ Victoria។

ចំណុចបន្ទាប់ ផ្ទៃដី៣លានហិកតាដែលរងខូចខាតគឺមិនអាចយកជាការបានទៀតទេ ដោយសារភ្លើងបានរាលដាលដល់កន្លែងផ្សេងទៀត ដូចនេះចំនួនសត្វជាច្រើនដែលបានរងផលប៉ះពាល់មានការកើនឡើងជាងការប៉ាន់ស្មានកន្លងមក។ ប៉ុន្តែទោះជាយ៉ាងណាវាគ្រាន់តែជាការប៉ាន់ស្មានតែប៉ុណ្ណោះ។ តួលេខនៃចំនួនសត្វល្មូនគឺមានភាពមិនច្បាស់លាស់ ហើយសត្វនេះមានចំនួន៣ភាគ៤នៃសត្វដែលរងផលប៉ះពាល់ក្នុងការគណនាទាំងនេះ៕