អង់គ្លេស៖ ក្លិបមាន់ខ្នាយមាស Tottenham Hotspur កំពុងពិចារណាក្នុងការដាក់សំណើខ្ចីជើងយកខ្សែបម្រើស្លាបសញ្ជតិបារាំងរបស់ក្លិប Athletico Madrid កីឡាករ Thomas Lemar ជាមួយនឹងជម្រើសក្នុងការទិញផ្ដាច់តម្លៃ៦០លានអឺរ៉ូ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សLemar ហាក់មិនសូវជាជោគជ័យជាមួយ AT Madrid នោះទេ ជាក់ស្ដែងចាប់តាំងពីផ្ទេរពី Monaco ក្នុងតម្លៃ៥២,២លានផោន មកកាន់ទឹកដីអេស្ប៉ាញកាលឆ្នាំ២០១៧មក រូបគេស៊ុតបញ្ចូលទីបាន៣គ្រាប់ប៉ុណ្ណោះក្នុងចំណោមការបង្ហាញខ្លួន៦៤ប្រកួតកន្លងទៅ។
យ៉ាងណាមិញ កាសែត Independent បានបញ្ជាក់ថា ជម្រើសជាតិបារាំង Lemar អាចនឹងចាកចេញពីក្លិបនាខែមករានេះក្នុងលក្ខខណ្ឌខ្ចីជើង ក្រោយស្ថិតនៅក្រៅជម្រើសរបស់លោក Diego Simeone។
ប្រភពដដែលបានបន្ថែមទៀតថា កិច្ចព្រមព្រៀងខ្ចីជើងនេះមានតម្លៃប្រមាណ៦លានអឺរ៉ូ ខណៈ Spurs ជាក្លិបមួយក្នុងចំណោមក្លិបធំៗផ្សេងទៀតដែលត្រៀមត្រងយកខ្សែបម្រើវ័យ២៤ឆ្នាំ។
ជាមួយគ្នានេះដែរ អ្នកចាត់ការទូទៅថ្មីក្រុម Tottenham Hotspur លោក Jose Mourinho មានបំណងស្វែងរកកីឡាករបន្ថែមក្នុងក្រុមរបស់លោក ក្រោយបាត់បង់ខ្សែប្រយុទ្ធឆ្នើមកីឡាករ Harry Kane ដោយសាររបួស ខណៈរបាយការណ៍បានបញ្ជាក់ថា ជម្រើសជាតិអង់គ្លេសរូបនេះត្រូវសម្រាកក្រៅទីលានយ៉ាងហោច៦សប្ដាហ៍។
គួរឲ្យដឹងដែរថា ក្រៅពី Lemar លោក Mourinho ក៏សម្លឹងឃើញខ្សែការពារកណ្ដាលរបស់ក្លិប Napoli កីឡាករ Koulibaly ផងដែរ ក្នុងគោលបំណងបន្ថែមគុណភាពក្នុងក្រុម ក្រោយ៥ប្រកួតចុងក្រោយលោកស្គាល់ជ័យជម្នះតែ១ដងប៉ុណ្ណោះ៕
ប្រភព៖ independent