អ៊ីតាលី៖ ក្រុមសេះបង្កង់ Juventus ដណ្ដើមបាន៣ពិន្ទុយ៉ាងជោគជ័យ ក្រោយប្រកួតឈ្នះក្រុម Cagliari ក្នុងលទ្ធផល ៤ទល់នឹង០ ក្រោមក្រសែភ្នែកអ្នកគាំទ្រប្រមាណ៤ម៉ឺននាក់ នៅកីឡដ្ឋាន Allianz Stadium កាលពីរាត្រីថ្ងៃច័ន្ទម្សិលមិញ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សក្នុងការប្រកួតដ៏ជក់ចិត្តនេះ ក្រុមម្ចាស់ផ្ទះ Juventus មានឱកាសសម្រុកច្រើនទៅលើក្រុមភ្ញៀវ ដោយស៊ុតបានរហូតដល់១៥ជើង ចំគោលដៅ៩ដង សម្រេចទីបាន៤គ្រាប់ ចំណែកឯក្រុម Cagliari ស៊ុតបាន៥ជើង និងចំគោលដៅតែ២ដងប៉ុណ្ណោះ។
៤គ្រាប់របស់ក្រុមលោក Sarri ធ្វើបានដោយកីឡាករ២រូប ក្នុងនោះកំពូលខ្សែប្រយុទ្ធវ័យ៣៤ឆ្នាំ កីឡាករ Cristiano Ronaldo ស៊ុតបាន៣គ្រាប់ម្នាក់ឯង និងខ្សែប្រយុទ្ធសញ្ជាតិអាហ្សង់ទីនកីឡាករ Gonzalo Higuain រកបាន១គ្រាប់។
តាមរយៈលទ្ធផលនេះ Juventus បានត្រឹមឈរចំណាត់ថ្នាក់លេខ២ក្នុងតារាង Serie A សប្ដាហ៍ទី១៨ ទោះពួកគេរកបាន ៤៥ពិន្ទុ ស្មើក្រុមកំពូលតារាង Inter Milan ក៏ដោយ ដោយសារចាញ់គ្រាប់ចំណេញក្រុមលេខ១ចំនួន៦គ្រាប់។
គួរឲ្យដឹងដែរថា នេះជាលើកទី១ហើយដែល Ronaldo ស៊ុតបាន Hat-trick នៅលីគអ៊ីតាលី Serie A ខណៈក្នុងរដូវកាលនេះរូបគេបង្ហាញខ្លួនបាន២២ប្រកួត និងរកបាន១៥គ្រាប់៕