អង់គ្លេស៖ ក្រុមតោខៀវ Chelsea ត្រូវបានគេរាយការណ៍ថា បានខិតជិតក្នុងការសម្រេចកិច្ចព្រមព្រៀងផ្ទេរយកខ្សែបម្រើស្លាបឆ្នើមរបស់ក្លិប Crystal Palace កីឡាករ Wilfried Zaha។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សZaha បានក្លាយជាគោលដៅសំខាន់របស់ក្រុម Chelsea បន្ទាប់ពីរូបគេបង្ហាញទម្រង់លេងបានយ៉ាងល្អក្នុងតំបន់ប្រយុទ្ធក្រុម Crystal Palace ពោល២៣ប្រកួតកន្លងទៅក្នុងរដូវកាលនេះ រូបគេចូលរួមចំណែករកគ្រាប់បាល់ឲ្យក្រុមបាន៦គ្រាប់។
យ៉ាងណា យោងតាមការចុះផ្សាយរបស់កាសែត Fox Sports បានឲ្យដឹងថា Chelsea ជាបេក្ខភាពដែលឈានមុខគេក្នុងការតាមទិញខ្សែបម្រើស្លាបវ័យ២៧ឆ្នាំរូបនេះ ដោយសារភ្នាក់ងារថ្មីរបស់ Zaha លោក Pini Zahavi មានទំនាក់ទំនងជិតស្និទ្ធជាមួយនឹងម្ចាស់ក្លិបក្រុមតោខៀវលោក Roman Abramovich។
ប្រភពដដែលបានបន្ថែមទៀតថា Crystal បានដាក់តម្លៃខ្លួនជម្រើសជាតិកូតឌីវ័ររូបនេះ ក្នុងតម្លៃ៨០លានផោន (ឬប្រមាណ១០៤លានដុល្លារអាមេរិក)។ ដូច្នេះមានន័យថា Chelsea ទំនងត្រូវចំណាយទឹកប្រាក់បំបែកកំណត់ត្រាប្រចាំក្លិប បើចង់នាំយក Zaha ចេញពីកីឡដ្ឋាន Selhurst Park ដោយក្រុមនៅភាគខាងលិចទីក្រុងឡុងដ៍មួយនេះធ្លាប់ចំណាយលុយច្រើនបំផុតត្រឹម ៧១លានផោន ទិញអ្នកចាំទី Kepa កាលពីឆ្នាំមុន។
គួររម្លឹកផងដែរថា Zaha ជាអតីតកីឡាកររបស់ក្រុមបិសាចក្រហម Manchester United ដោយបានផ្ទេរមកចូលរួមជាមួយនឹងក្រុម Crystal Palace កាលពីឆ្នាំ២០១៥ ដោយបង្ហាញខ្លួនសរុបបានចំនួន ៣៤៥ប្រកួត ស៊ុតបញ្ចូលទីបាន ៥៦គ្រាប់៕
ប្រភព៖ legit