លេងមែនទែនហើយ! គ្រាប់ផ្លោងចំនួន៣បានបាញ់សំដៅទៅកាន់ស្ថានទូតអាមេរិកក្នុងប្រទេសអ៊ីរ៉ាក់

អ៊ីរ៉ាក់៖ គ្រាប់ផ្លោងត្រូវបានបាញ់សំដៅទៅកាន់ស្ថានទូតអាមេរិកក្នុងទីក្រុងបាកដាដប្រទេសអ៊ីរ៉ាក់ ប៉ុន្តែវាបែរជាបាញ់ខុសគោលដៅទៅវិញ។ ប្រជាជនក្នុងតំបន់បានរាយការណ៍មកថាគ្រាប់ទាំងនោះបែរជាប្លោងទៅចំអគារមួយផ្សេងនិងបានសម្លាប់ជនស៊ីវិលមួយចំនួនផងដែរ។

បន្ទាប់ពីមេបញ្ជាការយោធាកំពូលរបស់អ៊ីរ៉ង់គឺលោក កាសេម​ សូឡីម៉ានី ត្រូវបានសម្លាប់ដោយការវាយប្រហារតាមអាកាសនៅព្រលានយន្តហោះអ៊ីរ៉ាក់កន្លងមក ស្ថានទូតអាមេរិកប្រចាំប្រទេសអ៊ីរ៉ាក់ចាប់ផ្ដើមទទួលរងការគំរាមកំហែងជាបណ្ដើរៗហើយ។

មន្ត្រីយោធាអ៊ីរ៉ាក់បាននិយាយនៅក្នុងសេចក្ដីថ្លែងការណ៍មួយថាគ្រាប់ផ្លោង Katyusha ចំនួនបីគ្រាប់បានបាញ់ចូលក្នុងទីក្រុងបាកដាដ ដោយពីរគ្រាប់បានធ្លាក់ចំតំបន់ Green Zone និងមួយគ្រាប់ទៀតធ្លាក់នៅជិតតំបន់ Jadriya។ បើតាមប្រភពពីមន្ត្រីប៉ូលិសបានឲ្យដឹងថាមនុស្សចំនួន៦នាក់បានរងរបួស ដោយសារតែគ្រាប់ផ្លោងមួយគ្រាប់បានធ្លាក់ចំផ្ទះប្រជាពលរដ្ឋ។

ប្រភពពីប្រជាពលរដ្ឋនៅក្នុងទីក្រុងបាកដាដបានឲ្យដឹងថាគ្រប់គ្នាបានឮសំឡេងផ្ទុះយ៉ាងខ្លាំងក្នុងតំបន់ Green Zone ហើយសំឡេងផ្ទុះនោះកើតឡើងនៅក្បែរស្ថានទូតអាមេរិក។ មិនទាន់មានសេចក្ដីរាយការណ៍បញ្ជាក់ឲ្យច្បាស់ថាតើនរណាជាអ្នកនៅពីក្រោយការបាញ់គ្រាប់ផ្លោងទាំងនោះទេ៕