មួយជើងពីចម្ងាយនេះល្អពេកហើយ! Man City លត់មួយដំប ខណៈ Man UTD បានត្រឹមស្មើនិងធ្វើរឿងមិននឹកស្មានមួយ (មានវីដេអូ)

អង់គ្លេស៖​ ការប្រកួតពានរង្វាន់ FA Cup បានបញ្ចប់ទៅជាច្រើនគូកាលពីយប់មិញ ប៉ុន្តែអ្វីដែលគួរឲ្យកត់សម្គាល់នោះគឺបងប្អូនត្រកូល Manchester ទាំងពីរ បានត្រឹមតែឈ្នះ១ និងស្មើ១ប៉ុណ្ណោះគឺ Manchester City យកឈ្នះ Port Vale ៤-១ ចំណែក Manchester United បានត្រឹមស្មើគ្នា 0-0 ជាមួយ Wolverhampton។

៤គ្រាប់របស់កូនក្រុមលោក Pep Guardiola រកបានដោយកីឡាករ៤រូបផ្សេងក្នុងម្នាក់មួយគ្រាប់រួមមាន Zinchenko, Aguero, Harwood-Bellis និង Phil Foden ខណៈ១គ្រាប់របស់ Port Vale ធ្វើបានសម្រេចដោយកីឡាករ Tom Pope។ អ្វីដែលគួរឲ្យចាប់អារម្មណ៍សម្រាប់ការប្រកួតនេះគឺគ្រាប់ទី១របស់ Man City កើតចេញពីការស៊ុតជើងឆ្វេងពីចម្ងាយចូលទីយ៉ាងល្អរបស់ម្ចាស់អាវលេខ១១ Oleksandr Zincehnko។

ងាកមកមើលបិសាចក្រហម Manchester United និង Wolverhampton ឯណេះវិញ ចប់៩០នាទីមិនអាចទម្លុះសំណាញ់ទីគ្នាបាននោះទេ បើទោះបីជាមានការស៊ុតគ្នាច្រើនក៏ដោយ។ អ្វីដែលមិននឹកស្មានសម្រាប់ការប្រកួតរវាង Man UTD និង Wolves យប់មិញ គឺក្រុមរបស់លោក Ole Gunnar Solskjaer មិនអាចស៊ុតចំគោលដៅសូម្បី១ដង ដែលនេះជាលើកទី២ហើយសម្រាប់ Man UTD ចាប់តាំងពីបង្កើតក្លិបមក៕

ចង់ជ្រាបកាន់តែច្បាស់ សូមទស្សនាវីដេអូខាងក្រោម៖