អីយ៉ាស! Bayern ចូលរួមប្រជែងជាមួយ Man UTD និង Chelsea ស្រវាយកខ្សែប្រយុទ្ធស្លាបតម្លៃខ្ទង់ ១០០លានមួយរូប

អាល្លឺម៉ង់៖ ក្លិបយក្សអាល្លឺម៉ង់ Bayern Munich ត្រូវបានគេរាយការណ៍ថា បានចូលរួមប្រជែងជាមួយនឹងក្លិបបិសាចក្រហម Manchester United និងក្លិបតោខៀវ Chelsea ក្នុងការចុះកុងត្រាយកខ្សែប្រយុទ្ធស្លាបវ័យ១៩ឆ្នាំ របស់ក្រុម Borussia Dortmund កីឡាករ Jadon Sancho។

Sancho ត្រូវបានគេចាត់ទុកថា ជាកីឡាករកំពុងឡើងកូដ១រូបនាពេលបច្ចុប្បន្ន ជាក់ស្ដែង ក្នុងរដូវកាលនេះ គិតរាល់កម្មវិធីទាំងអស់ រូបគេបង្ហាញខ្លួនបាន២៤ប្រកួត ស៊ុតបញ្ចូលទីបាន១២គ្រាប់និងបញ្ជូនបាល់ឲ្យមិត្តរួមក្រុមសម្រេចទីបាន១៣ដង។

យ៉ាងណាមិញ កាសែត The Sun បានអះអាងថា ជម្រើសជាតិអង់គ្លេសរូបនេះ បច្ចុប្បន្នកំពុងមានទំនាក់ទំនងខ្លាំងក្នុងការផ្ទេរទៅកាន់ទឹកដីប្រទេសអង់គ្លេស ដោយក្លិបដែលកំពុងចាប់អារម្មណ៍ចង់បានរូបគេរួមមាន ក្រុមជើងឯក Premier League ១៣សម័យ Manchester United និងក្រុមភាគខាងលិចទីក្រុងឡុងដ៍តោខៀវ Chelsea។

លើសពីនេះទៅទៀត ប្រភពដដែលបានបន្ថែមទៀតថា Dortmund បានដាក់តម្លៃខ្លួនចំពោះខ្សែប្រយុទ្ធដែលនៅសល់កុងត្រារយៈពេលពីរឆ្នាំទៀតរូបនេះ ប្រមាណលើស១០០លានផោន។

យ៉ាងណា កាលពីពេលថ្មីៗកាសែត​ The Metro បានចុះផ្សាយថា ក្លិប Bayern Munich ក៏មានបំណងក្នុងការតាមចែចូវយក Sancho ផងដែរ។

ទោះជាយ៉ាងណាក៏ដោយ ជុំវិញព័ត៌មានខាងលើនេះ ត្រូវបានអ្នកវិភាគកីឡាភាគច្រើនយល់ឃើញថា Bayern Munich ហាក់មានការលំបាកជាងក្រុមដទៃក្នុងការទទួលបាន Sancho ដោយមូលហេតុចំបងនោះគឺ Dortmund ទំនងមិនចង់លក់គ្រាប់ពេជ្ររបស់ខ្លួនទៅកាន់ក្លិបគូប្រជែង។

គួរឲ្យដឹងដែរថា​ Dortmund បានទិញខ្សែប្រយុទ្ធស្លាបវ័យក្មេងរូបនេះ ពីក្លិបមេឃខៀវ Manchester City ក្នុងតម្លៃត្រឹម៧.៨៤លានអឺរ៉ូប៉ុណ្ណោះ (ឬប្រមាណ ៨.៧លានដុល្លារអាមេរិក) កាលពីឆ្នាំ២០១៧៕