ការជជែកវែកញែកពីស្ថានភាពវិជ្ជាជីវៈ និងជំនាញរបស់ពេទ្យក្នុងស្រុក នៅតែជាបញ្ហាដ៏ក្តៅគគុកមួយក្នុងរង្វង់អ្នកត្រូវការសេវាសុខភាព។ នៅតែក្តៅត្រង់ថា ពលរដ្ឋមួយចំនួនហាក់បង្ហាញនូវការអស់ជំនឿចិត្តលើពេទ្យស្រុកខ្មែរ ខណៈពួកគេបានផ្សាយតាមបណ្តាញសង្គមនូវភាពខ្វះចន្លោះរបស់ពេទ្យ និងមន្ទីរពេទ្យធំៗមួយចំនួននៅកម្ពុជាជាបន្តបន្ទាប់។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សកង្វះវិជ្ជាជីវៈ និងជំនាញមួយចំនួនពីសំណាក់គ្រូពេទ្យក្នុងស្រុក ដែលកើតឡើងកន្លងមកបានបង្កឲ្យមានការបាត់បង់ជំនឿចិត្តពីសំណាក់អ្នកប្រើប្រាស់សេវាទាំងនោះ។ មិនតែប៉ុណ្ណោះទៀតសោត អ្នកដែលធ្លាប់ជួបប្រទះបញ្ហា គេអាចនឹងនិយាយតៗគ្នាថា«ពេទ្យស្រុកខ្មែរ មួយណា ក៏ដូចមួយណា»។
កត្តាទាំងនោះហើយដែលជម្រុញឲ្យអ្នកជំងឺមួយចំនួនព្រួយបារម្ភថាបើព្យាបាលដោយប្រើសេវាពេទ្យក្នុងស្រុក សុវត្ថិភាពអាចនឹងមិនបានដូចចិត្ត ដែលជាហេតុជម្រុញឲ្យអ្នកទាំងនោះសម្រេចចិត្តជ្រើសយកសេវាសុខាភិបាលនៅក្រៅប្រទេសជំនួសវិញ។
ជាក់ស្តែងកន្លងទៅនេះ មានសាច់ញាតិអ្នកជំងឺមួយរូបបានចេញមុខរិះគន់ចំៗលើមន្ទីរពេទ្យកាល់ម៉ែត្រយ៉ាងចាស់ដៃ។ នៅក្នុងវីដេអូរយៈពេលជិត២០នាទី បុរសម្នាក់បានបង្ហោះនិយាយពីភាពមិនច្បាស់លាស់របស់វេជ្ជបណ្ឌិតមួយចំនួនក្នុងមន្ទីរពេទ្យ កាល់ម៉ែត្រដែលពិនិត្យសុខភាពម្តាយលោក តែបែរជាបង្ហាញនូវភាពខ្វះជំនាញដោយប្រើពាក្យពេចន៍ថាសង្ស័យទៅលើអាការៈជំងឺ តែមិនបានបង្ហាញនូវភាពប្រាកដនិយមទៅវិញ។ លោកបន្ថែមថា ចំណែកចរិតរបស់ពេទ្យវិញហាក់បង្ហាញនូវការចង់បានថវិកាពីអ្នកជំងឺច្រើនជាងចង់ជួយសង្គ្រោះអាយុជីវិត។
សូមទស្សនានូវវីដេអូដែលលោកបកស្រាយ ហើយត្រូវបានទស្សនិកជនចែកចាយបន្ត៖
ជាការកត់សម្គាល់ បន្ទាប់ពីមានការបន្តចែកចាយយ៉ាងស្អេកស្កះដូច្នេះ គេឃើញមានការឆ្លើយតបពីក្រុមការងារទំនាក់ទំនងសាធារណៈមន្ទីរពេទ្យកាល់ម៉ែត ដោយបញ្ជាក់ថា៖ «ចំពោះវីដេអូដែលត្រូវបានគេបន្ត ចែករំលែកនេះ គឺត្រូវបានម្ខាស់ខ្លួនបង្ហោះលើបណ្តាញសង្គមជាច្រើនឆ្នាំមកហើយ។ ហើយម្ចាស់Post វីដេអូនៅក្នុងរឿងនេះ ក៏បានសុំទោសជាផ្លូវការមកមន្ទីរពេទ្យរួចហើយដែរ ដោយហេតុថាជាព័ត៌មាន ក្លែងប្រឌិត បង្កប់ចេតនាមិនល្អ មកលើការខិតខំប្រឹងប្រែងនៃការផ្តល់សេវាជូនអ្នកជំងឺ ពីសំណាក់ក្រុមការងារជំនាញពហុឯកទេស ក្នុងភាពថ្លៃថ្នូរ និងខ្ពង់ខ្ពស់បំផុត។»
បន្ថែមលើនេះ មន្ទីរពេទ្យខាងលើបានណែនាំឲ្យអ្នកប្រើប្រាស់បណ្តាញសង្គម ពិនិត្យអោយបានគ្រប់ជ្រុងជ្រោយមុននឹងចែកចាយព័ត៌មានទាំឡាយ ដោយស្មារតីទទួលខុសត្រូវខ្ពស់ទាំងមនសិការវិជ្ជាជីវៈ និងផ្លូវច្បាប់។
យ៉ាងណាក៏ដោយ ការផ្សាយទាំងនោះបើទោះបីជារឿងពិត ឬមិនពិត តែក៏អាចជាចំណែកមួយដែលធ្វើឲ្យពេទ្យដែលមានសមត្ថភាពពិតប្រាកដក្នុងស្រុកខ្មែរកំពុងមានការព្រួយបារម្ភៗ ព្រោះថាពលរដ្ឋដែលបានដឹងឮកាន់តែមានភាពខ្លាចរអាលើប្រសិទ្ធិភាព និងសមត្ថភាពរបស់ពេទ្យខ្មែរ ខណៈមានការចែកចាយព័ត៌មានព្រោងព្រាតលើបណ្តាញសង្គម។
ជាក្តីបារម្ភមួយផងដែរ ខណៈមានមតិស្រដៀងៗគ្នារបស់អ្នកទស្សនាថា បើពលរដ្ឋអស់ជំនឿមែននោះ ប្រាក់ចំណាយរបស់ខ្មែរនឹងរត់ចេញពីប្រទេសនេះទៅកាន់ប្រទេសជិតខាងដូចទឹកបាក់ទំនប់។ ចំណែកផលប៉ះពាល់សេដ្ឋកិច្ចតិច ឬច្រើនក៏អាចកើតមានដោយសារទង្វើរបស់ស្ថាប័ន និងគ្រូពេទ្យមួយចំនួន៕