ក្នុងទំនាក់ទំនងទាំងមិត្តភាព និងស្នេហា យើងជួបមនុស្សច្រើនដែលឈានជើងចូលជីវិតយើង។ បុគ្គលខ្លះល្អគ្រប់យ៉ាង ស្រលាញ់យើងស្មោះត្រង់ តែយើងមិនចង់សូម្បីមើលមុខគេ។ មនុស្សខ្លះយើងស្រលាញ់ស្ទើរលេប យកចិត្តទុកដាក់ចំពោះគេ ទាក់ទងគ្នាមួយរយៈ គេក៏បាត់មុខ។ តែអ្វីដែលធ្វើឲ្យយើងឆ្ងល់ ហើយចេះតែរកចម្លើយមិនឈប់ឈរនោះគឺ យើងល្អប៉ុណ្ណឹងដែរ ហេតុអ្វីគេនៅតែចាកចេញ?
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សនេះជាចម្លើយៈ
១. អត្តចរិតខុសគ្នា៖
គ្រាថ្មីៗនៅពេលមានទំនាក់ទំនងផ្អែមល្ហែមជាមួយគ្នា យើងជឿជាក់ថាក្តីស្រលាញ់របស់យើងនឹងអាចលុបនូវលក្ខណៈខ្វះខាតទាំងសងខាង។ យ៉ាងណាស្ថានភាពបែបនោះបានតែដំបូងប៉ុណ្ណោះ ព្រោះយូរៗទៅពេលវេលាជាអ្នកបង្ហាញថា អត្តចរិត និងចំណូលចិត្តមិនដូចគ្នាធ្វើឲ្យយើងមានភាពល្អក់កករច្រើនជាងសុភមង្គល។ បើទោះយើងល្អយ៉ាងណា ចុងក្រោយគេនៅតែត្រូវចាកចេញពីយើង។
២. ណាយចិត្ត៖
នរណាក៏និយាយដែរថាពេលល្អូកល្អឺន គឺជាពេលល្អ។ តែគ្រាដែលកាន់តែស្គាល់ពីគ្នាច្បាស់ដូចថ្ងៃ អ្វីគ្រប់យ៉ាងហាក់ប្រែប្រួល។ គេមិនដូចជាគេពីមុន។ មិនបារម្ភ មិនសូវចាប់អាម្មណ៍ពីយើងដូចមុន ដោយរកលេះថាគេរវល់ ទាំងដែលយើងមើលឃើញនឹងភ្នែកថាគេមានពេលទំនេរ។ ហើយមិនយូរប៉ុន្មានគេក៏ចាកចេញទាំងដែលយើងមិនមានកំហុស។
៣. ទុកយើងជាមនុស្សលេងសើច៖
ពេលដែលមិត្តភាពទើបតែឆ្លងដែនមកកាន់ដំណាក់កាលមួយទៀត គេថាក្តីស្រលាញ់ចំពោះយើងនឹងគ្មានថ្ងៃសាបសូន្យ។ មួយរយៈក្រោយមក គេមកម្តងទៀត ហើយប្រាប់យើងថា យើងល្អពេកមិនសក្តិសមនឹងគេ។ តាមពិតគេគ្រាន់តែចាត់ទុកយើងជាមនុស្សលេងសើច មិនមានបំណងឲ្យក្លាយជាមនុស្សសំខាន់មួយជីវិតឡើយ។ គេទុកយើងត្រឹមកង់សាគួរ គេអាចនឹងមានអ្នកទីពីរទៅហើយ។
៤. អស់និស្ស័យ៖
រឿងខ្លះធ្វើឲ្យយើងឃើញថា និស្ស័យគឺមានពិត គ្រាន់តែពិបាកនឹងបង្ហាញភស្តុតាងដូចវិទ្យាសាស្ត្រប៉ុណ្ណោះ។ មនុស្សខ្លះមើលទៅសាមញ្ញ មិនជាមានសម្រស់ណាស់ណាទេ តែយើងគ្រាន់តែឃើញភ្លាម មានអារម្មណ៍ថាចូលចិត្តណាស់។ អ្នកខ្លះទៀតមានទាំងសម្រស់ និងរសនិយមអស្ចារ្យ តែយើងបែរជាមិនចាប់អារម្មណ៍។
ចំណែកស្នេហាក៏ដូចគ្នា មួយពេលដែលយើងស្គាល់គ្នាភ្លាមៗ ស្វែងយល់ពីគ្នា យើងហាក់ដូចជាមាននិស្ស័យយ៉ាងខ្លាំង។ យើងនឹករឭកគេ មិនធុញទ្រាន់នឹងផ្ញើរសារទៅគ្នា ហើយរំភើបបំផុតពេលបាននៅក្បែរម្ខាងៗ។ ក្រោយមកទៀត និស្ស័យនោះហាក់រសាយដោយមិនងាកក្រោយ។ និស្ស័យដែលយើងជឿជាក់ថាមាន ក៏ចាប់ផ្តើមសាប។ បន្ទាប់មកគេក៏ចាកចេញដោយមិនលាក៏មាន៕