សោកស្ដាយណាស់! ក្រោយពិនិត្យរួច Harry Kane ត្រូវសម្រាកពីទីលានរយៈពេល…..

អង់គ្លេស៖ កម្លាំងសំខាន់របស់លោក Jose Mourinho កីឡាករខ្សែប្រយុទ្ធ Harry Kane នឹងត្រូវឃ្លាតចេញពីទីលានរយៈពេលពី៤ទៅ៦សប្ដាហ៍ ក្រោយមានបញ្ហារបួសរសៃពួរភ្លៅកំឡុងការប្រកួតដែល Spurs ចាញ់ Southampton ១-០ កាលពីថ្ងៃពុធកន្លងទៅ។

ប្រធានក្រុមរបស់ Spurs ត្រូវបានផ្លាស់ប្ដូរចេញក្នុងការប្រកួតនៅនាទីទី៧៥ បន្ទាប់ពីមានរបួស ក្រោយប៉ះទង្គិចជាមួយកីឡាកររបស់ Southampton។ ក្រោយការស្កេនរបួសនោះរួចហើយ Kane ត្រូវសម្រាកពីទីលានរយៈពេលចន្លោះពី៤ទៅ៦សប្ដាហ៍ ប៉ុន្តែក្រុមការងារគ្រូពេទ្យនៅតែបន្តតាមដានរបួសរបស់ Kane បន្តទៀត។

អវត្តមានរបស់ Kane អាចនឹងធ្វើឲ្យលោក Jose Mourinho ឈឺក្បាលនៅតំបន់ប្រយុទ្ធរបស់ Spurs ខណៈខ្សែប្រយុទ្ធឆ្នើមមួយរូបទៀត Son Heung-min នៅបន្តជាប់ពិន័យ១ប្រកួតទៀត បន្ទាប់ពីទទួលបានកាតក្រហមកំឡុងការប្រកួតជាមួយ Chelsea។

គួរឲ្យដឹងដែរថា ប្រកួតបន្ទាប់របស់ Spurs នឹងត្រូវជួបជាមួយម្ចាស់ផ្ទះ Middlesbrough នៅថ្ងៃអាទិត្យ ទី០៥ ក្នុងពានរង្វាន់ FA Cup មុននឹងបន្តមកប៉ះក្រុមមិនដែលចាញ់ Liverpool នៅថ្ងៃទី១១ ក្នុងក្របខណ្ឌ Premier League៕

ប្រភព៖ TheSun