អង់គ្លេស៖ បើតាមសេចក្ដីរាយការណ៍បានឲ្យដឹងថា Arsenal បាននឹងកំពុងតែតាមអន្ទងនាំយកខ្សែបម្រើរបស់ក្លិប Rangers កីឡាករ Glen Kamara បន្ទាប់ពីបានលួចទាក់ទងកីឡាករម្នាក់នេះអស់៦លើករួចមកហើយ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សខ្សែបម្រើវ័យ២៤ឆ្នាំម្នាក់នេះបានក្លាយជាគោលដៅសំខាន់របស់ Arsenal ក្រោយបានចាកចេញពីទីក្រុងឡុងដ៍ កាលពីឆ្នាំ២០១៧។ ជាអតីតថ្នាលយុវជនរបស់កាំភ្លើងធំ Kamara ត្រូវបានតម្លើងមកកាន់ក្រុមធំ ប៉ុន្តែចូលលេងបានតែ១លើកប៉ុណ្ណោះនៅក្នុងខែតុលា ឆ្នាំ២០១៥ ក្នុងការប្រកួតពានរង្វាន់ EFL Cup ជាមួយក្លិប Sheffield Wednesday។
យ៉ាងណាមិញ ក្រោយចាកចេញពីទឹកដីអង់គ្លេស Kamara បានបង្ហាញភាពលេចធ្លោមែនទែននៅលើទឹកដីស្កុតឡែនជាមួយក្លិប Rangers ដោយជួយឲ្យក្រុមដែលដឹកនាំដោយលោក Steven Gerrard ឈ្នះពានលីគកំពូលស្កុតឡែន។
កីឡាករជម្រើសជាតិហ្វាំងឡង់ Kamara ចូលលេងឲ្យ Rangers បានចំនួន២៩ប្រកួតហើយនៅក្នុងគ្រប់ព្រឹត្តិការណ៍ទាំងអស់រដូវកាលនេះ។ ដោយសារតែទម្រង់លេងដ៏គួរឲ្យចាប់អារម្មណ៍នេះហើយ បានធ្វើឲ្យ Arsenal ទាក់ទងទៅ Kamara ដល់ទៅ៦ដង។
បើតាមកាសែត Daily Mail ក្រុមដែលកំពុងស្ថិតក្រោមការដឹកនាំដោយលោក Mikel Arteta ត្រូវប្រឈមមុខជាមួយក្លិបអង់គ្លេស៣ទៀតរួមមាន Aston Villa, Crystal Palace និង Brighton & Hove Albion ដើម្បីនាំយក Kamara មកលេងនៅកីឡដ្ឋាន Emirate Stadium វិញ៕
ប្រភព៖ SportsMole