សោកស្ដាយ! សួនសត្វមួយនៅប្រទេសអាល្លឺម៉ង់ ត្រូវបានអគ្គិភ័យលេបត្របាក់គ្មានសល់ (មានវីដេអូ)

អាល្លឺម៉ង់៖ ចាប់ផ្ដើមថ្ងៃដំបូងនៃឆ្នាំថ្មី ២០២០ ភ្លាមក៏ស្រាប់តែមានរឿងដ៏គួរឲ្យសោកស្ដាយមួយបានកើតឡើង ដោយសារអគ្គិភ័យបានលេបត្របាក់ សួនសត្វ Krefeld ដែលស្ថិតនៅភាគខាងលិចនៃប្រទេសអាល្លឺម៉ង់ ហើយបានសម្លាប់ជីវិតសត្វមួយចំនួនទៀតផង។

ហេតុការណ៍នេះបានកើតឡើងនៅម៉ោងប្រហែល ១២ និង ៣០ នាទី ពោលគឺនៅថ្ងៃទី ១ ខែមករា ឆ្នាំ ២០២០ តែម្ដង ដែលបានសម្លាប់សត្វជាង ៣០ ក្បាល រួមមាន ស្វា ប្រចៀវ និងបក្សីជាច្រើនក្បាល។ តាមការឲ្យដឹងពីលោក Hoppmann ប្រជាពលរដ្ឋដែលជាអ្នកឃើញហេតុការណ៍ផ្ទាល់បានប្រាប់ថា មុនពេលកើតហេតុគេឃើញមានចង្កៀងគោមជាច្រើនត្រូវបានបង្ហោះដើម្បីអបអរថ្ងៃឆ្លងឆ្នាំ ហើយហោះកម្ពស់ទាបក្បែរនឹងសួនសត្វ ហើយមួយសន្ទុះក្រោយមក ក៏ស្រាប់តែឃើញមានអណ្ដាតភ្លើងឆេះចេញពីទីនោះតែម្ដង។ លោកបានបន្តថាក្រុមអ្នកស៊ើបអង្កេត បានរកឃើញកាក់សំណល់ចង្កៀងគោម ដែលធ្វើពីក្រដាសមានប្រវែង ៣៤ សង់ទីម៉ែត្រ ហើយនៅផ្ទៃខាងក្រោមមានដុំភ្លើងតូចមួយ ដែលវាជាកត្តាលីករបង្កើតជាខ្យល់ ហើយធ្វើឲ្យចង្កៀងគោមអាចហោះបាន។

គួរឲ្យដឹងផងដែរថា សួនសត្វ Krefeld បានបើកដំណើការដំបូងនៅឆ្នាំ ១៩៧៥ និងអាចទាក់ទាញភ្ញៀវទេសចរប្រមាណ ៤០ ម៉ឺននាក់ជារៀងរាល់ឆ្នាំ៕

សូមទស្សនារូបភាព និងវីដេអូខាងក្រោម៖