បើកឆាកឆ្នាំ២០២០ភ្លាម រដ្ឋធានីហ្សាការតាលិចទឹកភ្លាម ហើយប្រធានាធិបតីឥណ្ឌូនេស៊ីមានគម្រោងផ្លាស់រដ្ឋធានីថ្មីទៅកាន់...

ឥណ្ឌូនេស៊ី៖ យ៉ាងហោចណាស់ក៏មានមនុស្សស្លាប់យ៉ាងតិច១៦នាក់នៅក្នុងគ្រោះទឹកជំនន់នៅរដ្ឋធានីហ្សាការតាប្រទេសឥណ្ឌូនេស៊ី បន្ទាប់ពីទីក្រុងមួយនេះទទួលរងឥទ្ធិពលទឹកភ្លៀងយ៉ាងខ្លាំងក្នុងរយៈពេល២៤ឆ្នាំចុងក្រោយនេះ។ បើតាមទីភ្នាក់ងារឧតុនិយមអាកាសធាតុនិងភូគព្ភសាស្ត្របានឲ្យដឹងថាក្នុងពេលមួយថ្ងៃកម្ពស់ទឹកភ្លៀងបានកើនដល់៣៧៧មីលីម៉ែត្រនៅតំបន់អាកាសយានដ្ឋានមួយកន្លែងនៅភាគខាងកើតទីក្រុងហ្សាការតា។

ទីភ្នាក់ងារខាងលើបានបន្តទៀតថាភ្លៀងមួយមេធំក្នុងពេលតែមួយថ្ងៃតែងតែឧស្សាហ៍កើតមានតាំងពីឆ្នាំ១៩៩៦មកម្ល៉េះ ហើយភ្លៀងបង្អុរនៅថ្ងៃឆ្លងឆ្នាំសកលនេះក៏ខ្លាំងណាស់ដែរ។ វាក្លាយជារឿងសាមញ្ញទៅហើយ នៅពេលទឹកជំនន់កើតមាននៅក្នុងទីក្រុងដូច្នេះ។ ប្រធានាធិបតីរបស់ឥណ្ឌូនេស៊ីលោក Joko Widodo បានប្រកាសពីគម្រោងនឹងផ្លាស់ប្ដូររដ្ឋធានីពីទីក្រុងហ្សាការតាទៅកាន់ភាគខាងកើតកោះ Borneo វិញនៅប៉ុន្មានឆ្នាំខាងមុខនេះ ដោយសារតែជំនន់ទឹកភ្លៀងតែងតែកើតមានក្នុងទីក្រុងហ្សាការតា។

ហ្សាការតាគឺជាទីក្រុងមួយដែលងាយនឹងលិចទឹកលឿនជាងគេក្នុងចំណោមទីក្រុងដទៃទៀតនៅលើពិភពលោក ហើយអ្នកជំនាញបានលើកឡើងថាទីក្រុងមួយនេះអាចនឹងលិចទឹកទាំងស្រុងនៅឆ្នាំ២០៥០៕