អបអរសាទរ! អតីតអ្នកប្រដាល់ជើងខ្លាំង ឡោ សំណាង មានឈ្មោះអាវុធហត្ថវិញហើយ

ភ្នំពេញ៖ ពុកម៉ែបងប្អូនដែលនិយមតាមដានវិស័យកីឡាប្រដាល់គុនខ្មែរ ច្បាស់ជានូវចងចាំអតីតជើងខ្លាំងទម្ងន់ស្រាលកំឡុងឆ្នាំ២០០០ជាង កីឡាករមកពីក្លិបកងរាជអាវុធហត្ថលើផ្ទៃប្រទេស ឡោ សំណាង។

ដោយសារតែហ្វឹកហាត់នៅក្នុងក្លិបកងរាជអាវុធហត្ថលើផ្ទៃប្រទេស ឡោ សំណាង ក៏មានឈ្មោះជាមន្រ្តីរាជការក្នុងក្របខណ្ឌអាវុធហត្ថផងដែរ។ ក្រោយបាត់មុខពីសង្វៀនអស់ជាច្រើនឆ្នាំ ស្រាប់តែពេលថ្មីនេះៗ ឡោ សំណាង បាន Live វីដេអូរៀបរាប់ថាខ្លួនត្រូវកាត់ឈ្មោះចេញពីជួរមន្ត្រីកងរាជអាវុធហត្ថ ក្រោមហេតុផលមិនច្បាស់លាស់មួយ។

យ៉ាងណាមិញ នៅមុននេះបន្តិចអតីតអ្នកប្រដាល់ល្បឿនលឿនរូបនេះបានបង្ហោះរូបភាពមួយសន្លឹកដែលជារូបរបស់ នាយឧត្តមសេនីយ៍ សៅ សុខា មេបញ្ជាការកងរាជអាវុធហត្ថលើផ្ទៃប្រទេស នៅលើគណនី Facebook ផ្ទាល់ខ្លួនរបស់គេ អមដោយការសរសេររៀបរាប់សម្ដែងការអរគុណដល់លោកនាយឧត្តមសេនីយ៍ដែលបានផ្ដល់ក្របខណ្ឌកងរាជអាវុធហត្ថទៅឲ្យរូបគេវិញ៕