អង់គ្លេស៖ ក្រុមតោខៀវ Chelsea រកបានត្រឹម ១ពិន្ទុប៉ុណ្ណោះពីការប្រកួតសប្ដាហ៍ទី២១ ក្របខណ្ឌ Premier League ក្រោយស្មើគ្នា ១ទល់នឹង១ ជាមួយក្រុមម្ចាស់ផ្ទះ Brighton & Hove Albion កាលពីយប់មិញ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សChelsea ជាអ្នកបើកការនាំមុខមុននៅក្នុងការប្រកួតតាំងពីនាទីទី១០ ដែលធ្វើបានសម្រេចដោយខ្សែការពារប្រធានក្រុម Cesar Azpilicueta។ ការប្រកួតអូសបន្លាយដល់ជិតបញ្ចប់ការប្រកួតទៅហើយ ពោលគឺនៅនាទីទី៨៤ទើប Brighton អាចវាយបកតាមស្មើវិញបានដោយការស៊ុតបកចេកយ៉ាងល្អរបស់កីឡាករជម្រើសជាតិអ៊ីរ៉ង់ Jahanbaksh បន្ទាប់ពីទទួលបាល់លើកបញ្ជូនយ៉ាងល្អពីមិត្តរួមក្រុម Lewis Dunk។ ចប់ការប្រកួតពេញ៩០នាទី Brighton ១-១ Chelsea។
ស្ថិតិនៃការប្រកួតគឺក្រុមទាំងពីរមានឱកាសប្រហាក់ប្រហែលគ្នា ដោយអាចស៊ុតបាន ៨លើកដូចគ្នាគឺ Brighton ចំគោលដៅ៥ដង និងខុសគោលដៅ៣ដង ខណៈ Chelsea ចំគោលដៅ៤ដង និងមិនចំគោលដៅ៤ដង។
បើទោះបីមិនអាចរកបាន ៣ពិន្ទុក៏ដោយ ប៉ុន្តែ Chelsea នៅតែបន្តរក្សាតំណែង Top4 ដដែលដោយឈរនៅចំណាត់ថ្នាក់លេខ៤ លេង២១ប្រកួត ឈ្នះ១១ ស្មើ៣ និងចាញ់៧ មាន ៣៦ពិន្ទុ។ ចំណែកឯ Brighton ឈរនៅលេខ១៤ មាន២៤ពិន្ទុ៕