អង់គ្លេស៖ ក្រុមសារិកាព្រៃ Newcastle United ក្នុងនាមជាម្ចាស់ផ្ទះបានបើកទ្វារកីឡដ្ឋាន St James' Park ទទួលស្វាគមន៍ក្រុមភ្ញៀវកញ្ជ្រោងខៀវ Leicester City ក្នុងការប្រកួតក្របខណ្ឌ Premier League សប្ដាហ៍ទី២១កាលពីរាត្រីថ្ងៃពុធម្សិលមិញនេះ ក្រោមក្រសែភ្នែកអ្នកគាំទ្រប្រមាណ៥ម៉ឺននាក់។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សក្នុងការប្រកួតនេះក្រុមភ្ញៀវមានឱកាសម្រុកច្រើនទៅលើក្រុមម្ចាស់ផ្ទះ ដោយស៊ុតបានរហូតដល់១៣ជើង ចំគោលដៅ១០ដង សម្រេចទីបាន៣គ្រាប់ ចំណែកឯក្រុមម្ចាស់ផ្ទះ ស៊ុតបាន៤ជើង ចំគោលដៅ២ដង។
៣គ្រាប់របស់ក្រុម Leicester ធ្វើបានដោយកីឡាករ៣រូប ដោយគ្រាប់ទី១ទម្លុះសំណាញ់ទីអតីតខ្សែបម្រើស្លាបរបស់ក្រុម Newcastle កីឡាករ Ayoze Perez ចំណែកឯគ្រាប់ទី២ ជាការអូសស៊ុតជើងឆ្វេងពីលើដំបូលទូកបញ្ចូលទីយ៉ាងអស្ចារ្យពីសំណាក់កីឡាករ James Maddison និងគ្រាប់ទី៣រកបានដោយកីឡាករ Hamza Choudhury។
ដូច្នេះការប្រកួតបញ្ចប់ទៅដោយក្រុមភ្ញៀវ Leicester City ទទួលជ័យជម្នះទៅក្រុមម្ចាស់ផ្ទះ Newcastle United ក្នុងលទ្ធផល ៣-០។
តាមរយៈលទ្ធផលនេះ បានជួយឲ្យក្រុម Leicester បន្តឈរលេខ២ ក្នុងតារាង Premier League មាន៤៥ពិន្ទុក្នុងដៃ ដេញពីក្រោយក្រុមកំពូលតារាង Liverpool ចំនួន១០ពិន្ទុ ខណៈក្រុម Newcastle ធ្លាក់មកកាន់ចំណាត់ថ្នាក់លេខ១៣ មានត្រឹម២៥ពិន្ទុគិតត្រឹម២១ប្រកួតកន្លងទៅ៕