មកដល់ Everton មិនទាន់ក្ដៅសាច់ផង Ancelotti ដាក់រ៉ាដា តាមប្រមាញ់ជួរមុខម្នាក់នេះពី Real Madrid

អង់គ្លេស៖​ Everton បានសម្លឹងឃើញក្នុងការនាំយកខ្សែបម្រើប្រយុទ្ធរបស់ Real Madrid កីឡាករ James Rodriguez នៅទីផ្សារដោះដូរកីឡាករខែមករាខាងមុខ​នេះ នេះបើតាមការចុះផ្សាយរបស់ទីភ្នាក់ងារសារព័ត៌មានអេស្ប៉ាញ El Desmarque។

អ្នកចាត់ការទូទៅថ្មីរបស់ Everton លោក Carlo Ancelotti មានលុយគ្រប់គ្រាន់ក្នុងការចំណាយដើម្បីនាំចូលកីឡាករថ្មីៗមកពង្រឹងក្រុម ដែលនេះជាអ្វីដែលបានឯកភាពគ្នាជាមួយថ្នាក់ដឹកនាំក្លិប មុនពេលលោកសម្រេចចិត្តចូលខ្លួនមកដឹកនាំ។

អ្នកចាត់ការទូទៅសញ្ជាតិអ៊ីតាលីរូបនេះបានចាប់អារម្មណ៍ក្នុងការនាំយក James Rodriguez មកធ្វើការជាមួយខ្លួនម្ដងទៀត តាំងពីលោកនៅដឹកនាំ Napoli កំឡុងទីផ្សារដោះដូរកីឡាកររដូវក្ដៅមកម្ល៉េះ។

El Desmarque បានឲ្យដឹងថា មិនមែនតែ Everton នោះទេដែលចាប់អារម្មណ៍មកលើខ្សែប្រយុទ្ធជម្រើសជាតិកូឡុំប៊ី James នៅមាន Arsenal, Inter Milan, Roma និង Marseille ខណៈតម្លៃខ្លួនរបស់គេវិញគឺប្រមាណជា ៤៣លានផោន។​

James ចូលលេងឲ្យ Real Madrid បានត្រឹមតែ៩ប្រកួតប៉ុណ្ណោះនៅរដូវកាលនេះ ខណៈលោក Zinedine Zidane គ្រោងនឹងបញ្ចេញអតីតកីឡាករជំនាញជើងឆ្វេងរូបនេះចេញនៅទីផ្សារខែមករាខាងមុខ។

គួរឲ្យដឹងដែរថា James ធ្លាប់ធ្វើការជាមួយលោក Ancelotti ពីរលើករួចមកហើយគឺនៅ Real Madrid និង Bayern Munich។ យើងនឹងរង់ចាំមើលទាំងអស់គ្នាថាតើលោក Carlo Ancelotti អាចនាំយកម្ចាស់ស្បែកជើងមាស World Cup ឆ្នាំ២០១៤ មកធ្វើការជាមួយខ្លួនជាលើកទី៣នៅ Everton បានដែរឬទេ?

ប្រភព៖ DailyMail