ប្រទះឃើញ Shawn និង Camila ឈរដោះអាវ ឱបថើបគ្នានៅមាត់បង្អួចបន្ទប់ យ៉ាងរោលរាលទាំងព្រឹក!

បរទេស៖ អាចនិយាយបានថា បណ្តាអ្នកនិយមលេងអ៊ីនធឺណែត ស្ទើរតែទូទាំងពិភពលោកទៅហើយ ដែលស៊ាំភ្នែកជាមួយនឹង រូបថតស្អិតរមួតផ្អែមល្ហែមរបស់ តារាចម្រៀងប្រុសស្រី Shawn Mendes និង Camila Cabello ។

ដោយឡែក ស្រាប់តែថ្មីៗនេះ គូស្នេហ៍ថ្មីថ្មោងដ៏ស្អិតរមួតមួយគូនេះ នៅតែបន្តដុតអារម្មណ៍អ្នកគាំទ្រ ជាមួយនឹងរូបថតដ៏សែនរោលរាលជាច្រើនសន្លឹកទៀត ដែលទើបតែត្រូវបានគេប្រមាញ់បាន។

ជាការពិតណាស់ នាព្រឹកព្រលឹមថ្ងៃនេះ គេប្រមាញ់បានរូបថតរបស់ Shawn Mendes ជាមួយនឹង Camila Cabello នៅក្រៅមាត់បង្អួចបន្ទប់​នៃសណ្ឋគារមួយកន្លែង ដែលអ្នកទាំងពីរកំពុងតែឈរឱបថើបគ្នាយ៉ាងផ្អែមល្ហែម ទាំងគ្មានសម្លៀកបំពាក់ និងមើលទៅអ្នកទាំងពីរបានប្រលែងគ្នាលេង សើចសប្បាយយ៉ាងមានសេចក្តីសុខ នៅមាត់បង្អួចទាំងព្រឹកព្រលឹមថែមទៀតផង។

យ៉ាងណាមិញ បើទោះបីជានេះមិនមែនជាលើកទី១ ដែលអ្នកគាំទ្របានឃើញអ្នកទាំងពីរចាក់សោរបបូរជាមួយនឹងគ្នាយ៉ាងណាក្តី ប៉ុន្តែអ្នកគាំទ្រនៅតែអត់ច្រណែនមិនបាន ពីភាពទំនាក់ទំនងមិត្តភក្តិជិតស្និទ្ធ ប្រែក្លាយទៅជាស្នេហាដ៏រ៉ូមែនទិករបស់ Shawn និង Camila ផងដែរ៕