ប្រពៃណាស់! គ្រូបង្រៀនម្នាក់សុខចិត្តចំណាយប្រាក់ខែផ្ទាល់ខ្លួន ៨០% ដើម្បីជួយសង្គ្រោះជីវិតសត្វតាមចិញ្ចើមថ្នល់

ម៉ាឡេស៊ី៖ គួរឲ្យគោរពលោកគ្រូចិត្តធម៌មួយរូប បានលះបង់ប្រាក់ចំណូលរបស់ខ្លួនស្ទើរទាំងអស់ ព្រោះតែសេចក្ដីអាណិតអាសូរដល់ពពួកសត្វដែលគ្មានជម្រក និងទីពឹងទាំងឡាយនៅក្នុងតំបន់របស់លោក។

លោក Roslee Abbas គឺជាសាស្ត្រាចារ្យម្នាក់ ដែលមានចិត្តសប្បុរស និងស្រលាញ់សត្វចិញ្ចឹមណាស់។ គាត់បានជួយសង្គ្រោះសត្វដែលវង្វេងស្មារតីជាច្រើន ឲ្យមានជម្រក អាហារ និងការព្យាបាលនៅពេលពួកវាឈឺជាដើម។  ថ្វីត្បិតលោកជាអ្នកគោរពសាសនាមូស្លីមក៏ពិតមែន ក៏លោកនៅតែហ៊ានប៉ះពាល់ជាមួយនឹងប្រភេទសត្វដែលគេហាមឃាត់ដូចជា ឆ្កែ និងជ្រូកដែរ។

ទន្ទឹមនឹងនេះ លោកក៏បានបង្កើតអង្គការមួយដែលមានឈ្មោះថា HEART: Helping Rescue Team ក្នុងគោលបំណងជួយសត្វរងគ្រោះទាំងឡាយ។ អង្គការនោះមានទីតាំងនៅផ្ទះគាត់ផ្ទាល់តែម្ដង ហើយក្រុមរបស់លោកធ្វើការ ៦ថ្ងៃក្នុងមួយសប្តាហ៍ ចាប់ពីពេលព្រឹករហូតដល់ម៉ោង ៦ និង ៣០ នាទីល្ងាច។

គួរបញ្ជាក់ថា ប្រាក់ប្រហែល ៨០% ដែលជាប្រាក់បានមកពីការងារបង្រៀនរបស់លោក ត្រូវបានចំណាយទៅលើម្ហូបចំណីសម្រាប់សត្វឆ្មានិងឆ្កែ ក៏​ដូចជាការចំណាយលើថ្នាំពេទ្យផងដែរ៕