ជក់ចិត្តសាហាវមិនចាញ់ El Clasico ! Ederson បានកាតក្រហមដើមតង់ខណៈ Sterling ស៊ុតនាំមុខឲ្យ Man City បាន២គ្រាប់តែត្រូវចចកដាក់៣ចង្កូមវិញចុងម៉ោង (មានវីដេអូ)

អង់គ្លេស៖ ក្រុមចចកព្រៃ Wolverhampton Wanderers ក្នុងនាមជាម្ចាស់ផ្ទះបានបើកទ្វារកីឡដ្ឋាន Molineux Stadium ទទួលស្វាគមន៍ក្រុមភ្ញៀវមេឃខៀវ Manchester City ក្នុងជំនួបប្រចាំក្របខណ្ឌ Premier League សប្ដាហ៍ទី១៩ កាលពីយប់មិញនេះ។

ក្នុងការប្រកួតដ៏ស្វិតស្វាញនេះ ក្រុមម្ចាស់ផ្ទះមានឱកាសសម្រុកដាក់គំនាបខ្លាំងទៅលើក្រុមភ្ញៀវ​ ដោយស៊ុតបានរហូតដល់១៥ជើង ចំគោលដៅ១០ សម្រេចទីបាន៣គ្រាប់ ចំណែកឯក្រុមភ្ញៀវ ស៊ុតបានត្រឹម៥ជើងប៉ុណ្ណោះ ចំគោលដៅ២ដង ទម្លុះសំណាញ់ទីបាន២គ្រាប់។

ផ្លុំកញ្ចែចាប់ផ្ដើមការប្រកួត បានប្រមាណ១០នាទី អ្នកចាំទីសញ្ជាតិប្រេស៊ីលកីឡាករ Ederson បានប្រព្រឹត្តកំហុសទៅលើខ្សែប្រយុទ្ធស្លាបរបស់ក្រុម Wolves កីឡាករ Diogo Jota ត្រូវអាជ្ញាកណ្ដាលលោក Martin Atkinson មិនគិតគូយូរដកកាតក្រហមពិន័យបណ្ដេញចេញពីការប្រកួតភ្លាមៗ។

យ៉ាងណាមិញ ទោះបីមានគ្នាត្រឹម១០នាក់តែ Man City នៅតែអាចសម្រុកផ្ដល់សម្ពាធទៅលើក្រុមម្ចាស់ផ្ទះបាន ដោយមានឱកាសស៊ុតនាំមុខរហូតដល់ទៅ២គ្រាប់ តាមរយៈខ្សែបម្រើស្លាបសញ្ជាតិអង់គ្លេសកីឡាករ Raheem Sterling។

ប៉ុន្តែក្រុមម្ចាស់ផ្ទះ Wolves មិនបាននៅស្ងៀមឲ្យក្រុមលោក Pep កៀបសង្កត់នោះទេ​ ពួកគេបានកែប្រែទម្រង់លេងរហូតតដៃបាន៣គ្រាប់មកវិញ ដោយគ្រាប់ទី១ ធ្វើបានតាមរយៈខ្សែប្រយុទ្ធស្លាបវ័យ២៣ឆ្នាំកីឡាករ Adama Traore គ្រាប់ទី២ រកបានដោយកីឡាករ Raul Jimenez និងគ្រាប់ទី៣នៅនាទីទី៨៩ សម្រេចទីដោយខ្សែបម្រើ Matt Doherty។

ដូច្នេះក្រោយលេងចប់៩០នាទីក្រុមម្ចាស់ផ្ទះ Wolves បានទទួលជ័យជម្នះទៅលើក្រុមភ្ញៀវ Manchester City ក្នុងលទ្ធផល ៣ទល់នឹង២។ តាមរយៈលទ្ធផលនេះ ក្រុមមេឃខៀវនៅតែបន្តឈរលេខ៣ មាន៣៨ពិន្ទុក្នុងដៃ ខណៈក្រុមចចកព្រៃបានទម្លាក់ក្រុម Spurs ឡើងមកឈរលេខ៥វិញ ដោយ១៩ប្រកួតកន្លងទៅរកបាន៣០ពិន្ទុ៕

សូមទស្សនាការប្រកួតដ៏ជក់ចិត្តខាងក្រោមនេះ៖