តោះ! មកស្គាល់កំពូលកីឡាករចិត្តត្រជាក់ទាំង៥រូបដែលពុំធ្លាប់បានទទួលកាតក្រហមសូម្បីតែ១ដងក្នុងវិស័យបាល់ទាត់

បរទេស៖ បាល់ទាត់សម័យទំនើបនេះ ជឿជាក់ថាកីឡាករភាគច្រើនពិតជាពិបាកក្នុងការចៀសផុតពីការទទួលបានកាតក្រហម ដោយមូលហេតុថារាល់ការប្រកួតតែងតែមានការប៉ះទង្គិចគ្នាតិចឬក៏ច្រើនប៉ុណ្ណោះ។

កីឡាករខ្លះទទួលបានកាតក្រហមនេះ ដោយសារគ្រប់គ្រងអារម្មណ៍ឬកំហឹងខ្លួនឯងមិនបាន ហើយចំណែកខ្លះទៀតទទួលបានវា ដោយការបង្កកំហុសដោយអចេតនាឬចេតនាណាមួយ។

យ៉ាងណាមិញការសរសេរខាងលើនេះ មិនមែនមានន័យថារាល់កីឡាករទាំងអស់សុទ្ធតែមិនអាចចៀសផុតពីការទទួលបានកាតក្រហមនោះទេ ជាក់ស្ដែងយោងតាមគេហទំព័រ sportskeeda បានឲ្យដឹងថា មានវីរបុរសបាល់ទាត់៥រូបដែលមិនធ្លាប់ទទួលបានកាតក្រហមនេះសូម្បីតែ១ដងក្នុងអាជីពជាកីឡាករ។

កីឡាករទាំង៥រូបនោះមានដូចជា៖

• 1.    លោក Damien Duff ជាអតីតកីឡាករ របស់ក្លិប Blackburn, Chelsea, Newcastle និង Fulham គាត់បានចំណាយពេល១៤ឆ្នាំលេងនៅ Premier League ហើយវាពិតជារឿងដ៏មិនគួរឲ្យជឿមួយ ដែលខ្សែបម្រើសញ្ជាតិអៀរឡង់រូបនេះ មិនដែលទទួលបានកាតក្រហមសូម្បីតែ១ដងរាល់ការប្រកួតដែលគាត់ធ្លាប់ចូលលេងជាពិសេសក្នុងលីគដែលប្រកួតប្រជែងខ្ពស់ដូច Premier League។

• 2.   អតីតខ្សែប្រយុទ្ធកណ្ដាលរបស់ក្លិបយក្សអេស្ប៉ាញ Real Madrid កីឡាករ Raul Gonzalez ។ ចាប់តាំងពីចាប់ផ្ដើមអាជីពជាកីឡាករតាំងពីឆ្នាំ១៩៩២មក រហូតដល់ចូលនិវត្តឆ្នាំ២០១៥ លោកមិនដែលទទួលបានកាតក្រហមម្ដងណាឡើយ គាត់តែងតែគ្របគ្រងអារម្មណ៍គាត់បានទោះបីជាធ្លាប់ប្រកួតលក្ខណៈប្រកួតប្រជែងខ្លាំងដូចជាជំនួប El Classico ជាដើម។

• 3.   អតីតម្ចាស់អាវលេខ១១របស់ក្លិបបិសាចក្រហម Manchester United កីឡាករ Ryan Giggs ។ ឆ្លងកាត់ការប្រកួតជាង៩០០ប្រកួតក្នុងអាជីពជាកីឡាករ មិនថាក្នុងក្របខណ្ឌ​ Premier League ឬ Champions League ខ្សែបម្រើស្លាបសញ្ជាតិវេលដែលធ្លាប់មកកម្ពុជារូបនេះ មិនដែលទទួលបានកាតក្រហមនោះទេ។

• 4.    វីរបុរសក្លិប Bayern Munich កីឡាករ Philipp Lahm ។ គាត់ចំណាយពេលពេញ១អាជីពរបស់គាត់លេងនៅលីគអាល្លឺម៉ង់ គាត់ធ្លាប់ប្រកួតប៉ះក្រុមធំៗជាច្រើននៅតំបន់អឺរ៉ុប ដោយឡែកអ្វីដែលគួរឲ្យភ្ញាក់ផ្អើលនោះគឺ ក្នុងនាមជាខ្សែការពារស្លាប១រូបដែលមានតួនាទីសំខាន់ក្នុងការរារាំងគូប្រកួតដើម្បីការពារសំណាញ់ទីរបស់ខ្លួន និងលេងក្នុងតំបន់មួយដែលងាយនឹងមានការប៉ះទង្គិចច្រើន គាត់មិនដែលទទួលបានកាតក្រហមសូម្បីតែ១ដង។ 

• 5.   កីឡាករ Gary Lineker គាត់ធ្លាប់ជាអតីតកីឡាកររបស់ក្រុម Leicester, Everton, Barcelona, Spurs និង Nagoya Grampus។ ជាខ្សែប្រយុទ្ធកណ្ដាលដ៏មានចិត្តត្រជាក់ រយៈពេល១៨ឆ្នាំក្នុងពិភពបាល់ទាត់លោក មិនដែលស្គាល់រសជាតិកាតក្រហមម្ដងនោះទេ។

ប្រភព៖ sportskeeda