មិនគួរឲ្យជឿ! មុនចេញទៅប្រកួតនៅជប៉ុន សម្រកអស់១០គីឡូ ប៉ុន្តែ កែវ រំចង់ និយាយយ៉ាងខ្លីថា …….

កម្ពុជា៖ អ្នកលេងគុនខ្មែរមានដើមកំណើតមកពីខេត្តបាត់ដំបង កែវ រំចង់ បានចាកចេញពីប្រទេសកម្ពុជាកាលពីល្ងាចម្សិលមិញ ដើម្បីទៅចូលរួមការប្រកួតក្នុងកម្មវិធី Big Bang 37 នៅទីក្រុងតូក្យូ ប្រទេសជប៉ុន។

អ្វីដែលគួរឲ្យភ្ញាក់ផ្អើលសម្រាប់អ្នកគាំទ្រនោះគឺ ប្រើពេលវេលាត្រឹមរយៈពេល១២ថ្ងៃ កែវ រំចង់ សម្រកអស់១០គីឡូក្រាម។ និយាយមុនចេញដំណើរទៅប្រទេសជប៉ុន រំចង់ បានឲ្យដឹងថាគេសម្រកអស់១០គីឡូក្រាមត្រឹមរយៈពេល១២ថ្ងៃ ដើម្បីត្រៀមការប្រកួតដែលមកដល់នៅពេលខាងមុខនេះ។

អ្នកលេងគុនខ្មែរចិត្តធំរូបនេះក៏បានប្ដេជ្ញាយកឈ្នះដៃគូប្រកួត ដោយសង្ឃឹមដល់ទៅ៧០% ដោយថាគេបានហ្វឹកហាត់ត្រៀមខ្លាំង និងពេញលេញ។ យ៉ាងណាមិញ គេមិនបានមើលស្រាលដៃគូរបស់គេនោះទេ ដោយលើកហេតុផលថាគេមានដៃជើងពីរដូចគ្នា ហើយសមត្ថភាពក៏មិនអន់ដែរ។ រំចង់ ក៏បានអរគុណដល់អ្នកគាំទ្រដែលតែងតែគាំទ្ររូបគេរហូតមក និងសូមឲ្យបន្តគាំទ្ររូបគេសម្រាប់ការប្រកួតខាងមុខ។

គួរឲ្យដឹងដែរថា កម្មវិធី Big Bang 37 នឹងធ្វើឡើងនៅថ្ងៃទី២៩ ខែធ្នូ ឆ្នាំ២០១៩ នៅទីក្រុងតូក្យូ ខណៈដៃគូរបស់ កែវ រំចង់ គឺកីឡាករម្ចាស់ផ្ទះជប៉ុន Yamagiwa Kazuki ដែលការប្រកួតនឹងធ្វើឡើងនៅក្នុងប្រភេទទម្ងន់ ៦៧គីឡូក្រាម លក្ខណៈ Kickboxing៕