កម្ររកណាស់! ស្រ្តីម្នាក់បានរ៉ាប់រងទទួលសត្វឆ្មាអានាថា ២៥០ក្បាលមកចិញ្ចឹមទោះត្រូវចំណាយលុយផ្ទាល់ខ្លួនក៏ដោយ

ឥណ្ឌូនេស៊ី៖ ក្នុងសង្គមបច្ចុប្បន្ន គេឃើញមានមនុស្សភាគច្រើនចូលចិត្ត និងស្រលាញ់សត្វចិញ្ចឹមណាស់ តែអ្នកខ្លះបានត្រឹមតែ ថតរូបដើម្បីបង្ហោះក្នុងបណ្ដាញសង្គមក៏មាន។ ផ្ទុយទៅវិញ ស្រី្តមេផ្ទះ ជនជាតិឥណ្ឌូនេស៊ីម្នាក់មានឈ្មោះថា ឌីតា បានលះបង់ទាំងពេលវេលា និងប្រាក់កាសផ្ទាល់ខ្លួន ដើម្បីសង្គ្រោះជីវិតសត្វឆ្មាដែលគ្មានទីពឹងចំនួន ២៥០ ក្បាល។

ឌីតា នាងគឺជាមនុស្សម្នាក់ដែលស្រលាញ់ការចិញ្ចឹមសត្វតាំងតែពីនាងនៅក្មេងមកម្ល៉េះ ហើយសព្វថ្ងៃនាងក៏នៅតែបន្តវាដដែល ដោយបានរ៉ាប់រងទទួលចិញ្ចឹមសត្វឆ្មាដែលមិនមានម្ចាស់នៅក្នុងតំបន់ដែលនាងរស់នៅផងដែរ។ ឌីតា ត្រូវចំណាយលុយចំនួន ១ លាន រ៉ូពី (ជាង ៧០ ដុល្លារ ) ក្នុងមួយខែៗ សម្រាប់អាហារ និងការព្យាបាលផ្សេងៗ ព្រមទាំងជួលមនុស្ស ៥ នាក់ដើម្បីមកសម្អាតផ្ទះពីរដងក្នុងមួយខែទៀតផង។ នាងក៏បានបន្តថា នាងមិនយកសត្វឆ្មាណាដែលមានសុខភាពល្អមកចិញ្ចឹមនោះឡើយ គឺយកតែឆ្មាណាដែលពិការ ឬមានជំងឺមកចិញ្ចឹមតែប៉ុណ្ណោះ៕