រុស្ស៊ីបង្អួតអាវុធប្រល័យលោកថ្មីដែលមានល្បឿនលឿនជាងសំឡេង

រុស្ស៊ី៖ កាលពីថ្ងៃអង្គារ ប្រធានាធិបតីរុស្ស៊ីលោក វ្លាឌីមៀ ពូទីន បានបង្អួតអាវុធទំនើបចុងក្រោយនិងប្លែកខុសគេ ហើយលោកបានបោះពាក្យសម្ដីទៅកាន់បណ្ដាប្រទេសផ្សេងទៀតថាឲ្យព្យាយាមរត់តាមពួកគាត់។ ថ្លែងនៅក្នុងកិច្ចប្រជុំក្រុមប្រឹក្សាក្រសួងការពារជាតិរុស្ស៊ី លោកពូទីនបានបន្តទៀតថាគ្មានប្រទេសណាមានអាវុធដែលមានល្បឿនលឿនជាងសំឡេងនោះទេ មានតែយើងប៉ុណ្ណោះដែលធ្វើវាបានមុនគេ។ ដូចគ្នានឹងរុស្ស៊ីដែរ អាមេរិកនិងចិនក៏កំពុងធ្វើការលើគម្រោងនេះដែរ។​ នៅដើមឆ្នាំនេះប្រទេសចិនបាននិយាយថាកំពុងធ្វើតេស្តសាកល្បងយន្តហោះដែលមានល្បឿនលឿនជាងសំឡេង ហើយចំណែកកងទ័ពអាកាសរបស់អាមេរិកវិញបានផ្ដល់កិច្ចសន្យាឲ្យក្រុមហ៊ុន Lockheed Martin ដើម្បីអភិវឌ្ឍមីស៊ីល។

កាលពីឆ្នាំមុន លោកពូទីនបាននិយាយស្រដៀងគ្នាដែរថាប្រព័ន្ធមីស៊ីលដែលមានល្បឿនលឿនជាងសំឡេងនឹងបង្ហាញខ្លួនក្នុងឆ្នាំ២០១៩ ប៉ុន្តែមកដល់ពេលនេះមិនទាន់ឃើញមានអ្វីកើតឡើងនៅឡើយទេ។ កាលពីពេលថ្មីៗនេះ មេដឹកនាំប្រទេសរុស្ស៊ីរូបនេះបានបង្ហាញសាធារណជនពីអាវុធទំនើបៗដែលលោកបាននិយាយថាពួកវាអាចយកឈ្នះសហរដ្ឋអាមេរិកនិងអង្គការណាតូ។ ប៉ុន្តែកន្លងមកក្រុមអ្នកវិភាគបានសម្ដែងការប្រុងប្រយ័ត្នថាគ្មាននរណាគាំទ្រលើការបង្អួតពីឥទ្ធិពលអំណាចយោធារបស់រុស្ស៊ីឡើយ។ កាលពីថ្ងៃអង្គារនេះដែរ រុស្ស៊ីក៏បានធ្វើតេស្តយន្តហោះចម្បាំងមួយ Su-57 នៅឯតំបន់ Khabarovsk នេះបើតាមទីភ្នាក់ងារសារព័ត៌មានក្នុងស្រុករបស់រុស្ស៊ី៕