បរទេស៖ តារាកំពុងរះរបស់ក្លិប Red Bull Salzburg កីឡាករខ្សែប្រយុទ្ធ Erling Braut Haaland ត្រូវបានគេរាយការណ៍មកថាអាចនឹងបោះបង់ការទៅចូលរួមជាមួយ Manchester United ដោយគេសម្លឹងមើលឃើញការផ្លាស់ទៅទឹកដីអ៊ីតាលីជាមួយ Juventus វិញ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សកីឡាករវ័យ១៩ឆ្នាំ Haaland រកបាន២៨គ្រាប់ ក្នុងចំណោមការបង្ហាញខ្លួន២២ប្រកួតនៅរដូវកាលនេះ និងកំពុងតែមានព័ត៌មានយ៉ាងខ្លាំងថាអាចនឹងទៅចូលរួមនៅកីឡដ្ឋាន Old Trafford នៅទីផ្សារដោះដូរកីឡាករខែមករាខាងមុខ។
បិសាចក្រហម Manchester United ជឿថាខ្លួនជាបេក្ខភាពទីមួយក្នុងការទិញយកកីឡាករជម្រើសជាតិន័រវេសរូបនេះ ប៉ុន្តែបើតាមការចុះផ្សាយរបស់កាសែត Corriere dello Sport ក្លិប Juventus ទៅវិញទេដែលមានភាគរយខ្ពស់ក្នុងការទិញយកកីឡាករវ័យក្មេងរូបនេះ។
ប្រភពដដែលបានបន្តឲ្យដឹងទៀតថា Haaland គ្រោងនឹងចុះកិច្ចសន្យាកុងត្រារយៈពេល៥ឆ្នាំជាមួយក្លិបរហស្សនាមសេះបង្កង់។ ចំពោះកិច្ចសន្យារវាង Haaland និងក្លិប Red-Bull Salzburg វិញមានសុពលភាពដល់រដូវក្ដៅឆ្នាំ២០២៣ឯណោះ ប៉ុន្តែក្លិបរបស់អូទ្រីសមួយនេះបានបើកភ្លើងខៀវក្នុងការអនុញ្ញាតឲ្យ Haaland ចាកចេញនៅទីផ្សារខែមករាខាងមុខ បើសិនជាឈានដល់ការចរចាជោគជ័យណាមួយ។
គួររម្លឹកឡើងវិញដែរថា កាលពីទីផ្សារដោះដូរកីឡាកររដូវក្ដៅដែលទើបតែកន្លងផុតទៅ ក្លិបជើងឯកអ៊ីតាលីJuventus ក៏បានយកឈ្នះក្រុមលោក Ole Gunnar Solskjaer ក្នុងការទិញយកកីឡាករខ្សែការពារវ័យក្មេង Matthijs de Ligt ផងដែរ៕
ប្រភព៖ SportsMole