ជប៉ុន៖ ខ្សែការពារជម្រើសជាតិថៃកីឡាករ Theerathon Bunmathan នឹងបន្តអាជីពរបស់ខ្លួននៅលើទឹកដីជប៉ុន ក្រោយផ្លាស់ទៅចូលរួមជាផ្លូវការជាមួយក្លិបជើងឯកលីកកំពូលជប៉ុន Yokohama F. Marinos។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សTheerathon បានធ្វើពនេចរទៅដល់ទឹកដីជប៉ុនអស់រយៈពេល២រដូវកាលហើយក្រោមលក្ខខណ្ឌខ្ចីជើងពី Muangthong United ដោយកាលពីឆ្នាំ២០១៨ គេលេងឲ្យក្លិប Vissel Kobe និង២០១៩ លេងឲ្យ Yokohama។
កីឡាករវ័យ២៩ឆ្នាំ Theerathon បានស៊ុត១គ្រាប់ និងបញ្ជូនបាល់ឲ្យមិត្តរួមក្រុមបញ្ចប់ទីបានសម្រេច១ដង ក្នុងការប្រកួតវគ្គផ្ដាច់ព្រ័ត្រដែល Yokohama យកឈ្នះ Tokyo FC ក្នុងលទ្ធផល ៣ទល់នឹង០ និងឈ្នះពាន J1 League។ កីឡាករមានដើមកំណើតមកពីខេត្តណុនថាបុរីរូបនេះជាកីឡាករមកពីអាស៊ីអាគ្នេយ៍ទីមួយដែលឈ្នះពានរង្វាន់លីគកំពូលជប៉ុន។
ក្រោយជួយឲ្យក្លិបទទួលបានជោគជ័យ និងបង្ហាញទម្រង់លេងគួរឲ្យចាប់អារម្មណ៍ Theerathon ត្រូវបាន Yokohama ទិញផ្ដាច់រូបគេតែម្ដងសម្រាប់ឆ្នាំ២០២០ខាងមុខ។
គួរឲ្យដឹងដែរថា Theerathon ក៏ជាប់ឈ្មោះជាកីឡាករថៃដែលលេងល្អជាងគេប្រចាំឆ្នាំ២០១៩ ដែលរៀបចំឡើងដោយសហព័ន្ធកីឡាបាល់ទាត់ថៃ (FAT) ផងដែរ៕
ប្រភព៖ FoxSportsAsia