បច្ចេកវិទ្យាម៉ាស៊ីនថ្មីនិងថាមពលជំរុញផ្សេងៗ អាចជួយឲ្យការធ្វើដំណើរទៅភពអង្គារមានភាពលឿនជាងមុន

បរទេស៖ ដើម្បីធ្វើដំណើរទៅកាន់ភពក្រៅពីផែនដីរបស់យើង គេត្រូវការប្រភេទម៉ាស៊ីនថ្មីៗដើម្បីបំពាក់លើយានអវកាសទំនើបៗ ហើយក្រុមវិស្វករកំពុងស្រាវជ្រាវបច្ចេកវិទ្យាថ្មីៗដែលអាចធ្វើឲ្យការធ្វើដំណើរក្នុងប្រព័ន្ធព្រះអាទិត្យកាន់តែមានភាពរហ័សជាងមុន។ ដោយសារភពអង្គារនិងផែនដីវិលជុំវិញព្រះអាទិត្យដូចគ្នា ដូច្នេះភពទាំងពីរមានរយៈចម្ងាយនៅជិតគ្នា ៥៤.៩លានគីឡូម៉ែត្រ និងរយៈចម្ងាយឆ្ងាយពីគ្នា៤០១លានគីឡូម៉ែត្រ។

ក្នុងបេសកកម្មទៅកាន់ភពអង្គារគេត្រូវជ្រើសរើសចម្ងាយពេលដែលភពទាំងពីរនៅជិតគ្នា ហើយនៅក្នុងរយៈពេលនេះដែរគឺវាត្រូវប្រើរយៈពេល៩ខែដើម្បីធ្វើដំណើរទៅកាន់ភពអង្គារតាមរយៈរ៉ុកកែតគីមី។ ក្រុមវិស្វកររបស់ទីភ្នាក់ងារអវកាសណាសាបាននិងកំពុងធ្វើការជាមួយដៃគូឧស្សាហកម្មជាច្រើនដើម្បីអភិវឌ្ឍវិធីសាស្ត្រថ្មីៗដែលអាចបញ្ជូនពួកយើងទៅកាន់ភពអង្គារ។ វិធីសាស្ត្រទាំងនោះមានដូចជាថាមពលជំរុញបានពីពន្លឺព្រះអាទិត្យ ថាមពលជំរុញបានពីកម្ដៅនុយក្លេអ៊ែរ និងថាមពលជំរុញបានពីអ៊ីយ៉ុងអគ្គិសនី។ សម្រាប់ថាមពលជំរុញបានពីពន្លឺព្រះអាទិត្យគឺគេប្រើវាសម្រាប់ដឹកសម្ភារៈប្រើប្រាស់ផ្សេងៗមុនបេសកកម្មបញ្ជូនមនុស្សទៅកាន់ភពអង្គារ។

ពីព្រោះសម្ភារៈផ្គត់ផ្គង់ផ្សេងៗត្រូវទៅដល់មុនអវកាសយានិក នេះបើតាមសម្ដីរបស់លោកដុកទ័រ Jeff Sheehy ដែលជានាយកដឹកនាំក្រុមវិស្វកររបស់អង្គការណាសា។ ការប្រើប្រាស់ថាមពលជំរុញបានពីពន្លឺព្រះអាទិត្យអាចកាត់បន្ថយការប្រើប្រាស់ឥន្ធនៈហើយធ្វើឲ្យយានស្រាលជាងមុន ក៏ប៉ុន្តែវាត្រូវចំណាយពេលវេលាយូរដើម្បីធ្វើដំណើរ។ ចំណែកថាមពលជំរុញបានពីកម្ដៅនុយក្លេអ៊ែរគឺគេប្រើវាជាមួយរ៉ុកកែតគីមីនៅពេលយានបានចូលទៅដល់ទីអវកាស ប៉ុន្តែវាក៏អាចបង្កជាគ្រោះថ្នាក់ដល់អវកាសយានិកដែលនៅក្នុងយានផងដែរ។

ចុងក្រោយថាមពលជំរុញបានពីអ៊ីយ៉ុងអគ្គិសនីក៏ត្រូវបានគេជ្រើសរើសសម្រាប់បេសកកម្មទៅភពអង្គារដែរ។ កន្លងមកថាមពលមួយនេះត្រូវបានគេប្រើប្រាស់ជាមួយផ្កាយរណបផ្សេងៗរួចមកហើយ និងពេលនេះដែរគេចង់ប្រើវាដើម្បីបញ្ជូនមនុស្សទៅកាន់ភពអង្គារ។ គេរំពឹងទុកថាថាមពលមួយនេះអាចជួយឲ្យការធ្វើដំណើរទៅកាន់ភពអង្គារមានរយៈពេលតិចជាង៩ខែ៕