លេចលឺព័ត៌មានថា Apple កំពុងសំងំអភិវឌ្ឍបច្ចេកវិទ្យាផ្កាយរណបផ្ទាល់ខ្លួន

អាមេរិក៖ កាលពីពេលថ្មីៗនេះក្រុមហ៊ុន Apple ត្រូវបានគេរាយការណ៍មកថាកំពុងអភិវឌ្ឍផ្កាយរណបផ្ទាល់ខ្លួន និងបានជួលវិស្វករខាងផ្នែកអវកាសជាច្រើននាក់រួមជាមួយអ្នករចនាម៉ូដផ្កាយរណបនិងអង់តែនជាច្រើននាក់ផងដែរ នេះបើតាមការចុះផ្សាយរបស់ទីភ្នាក់ងារសារព័ត៌មាន Bloomberg។ នៅក្នុងរបាយការណ៍បានសរសេរថាវាគឺជាគម្រោងតំណាក់កាលដំបូងនិងលាក់ការសម្ងាត់ ហើយគោលដៅរបស់វាគឺចង់អភិវឌ្ឍបច្ចេកវិទ្យាផ្កាយរណបដែលប្រើសម្រាប់ទំនាក់ទំនងនិងដើម្បីបញ្ជូននិងទទួលទិន្នន័យដោយផ្ទាល់ពីឧបករណ៍របស់ Apple ដូចជា iPhone ដែលមិនចាំបាច់ពឹងពាក់បណ្ដាញសេវាពីខាងក្រៅដូចកាលពីមុន។ សារព័ត៌មាន Bloomberg បាននិយាយបន្ថែមទៀតថា Apple មិនចាំបាច់បង្កើតបច្ចេកវិទ្យាផ្កាយរណបផ្ទាល់ខ្លួននោះទេ ប៉ុន្តែវាគួរតែបង្កើតទីស្នាក់ការមួយនៅលើដីដើម្បីប្រើសម្រាប់ទំនាក់ទំនងដូចជាការទទួលនិងបញ្ជូនទិន្នន័យនៅលើឧបករណ៍ដែលជាផលិតផលរបស់ខ្លួន។

បច្ចេកវិទ្យាផ្កាយរណបផ្ទាល់ខ្លួនរបស់ក្រុមហ៊ុន Apple អាចនឹងជួយឲ្យការចាប់ទីតាំងនៅលើផែនទីកាន់តែមានភាពសុក្រឹតហើយជួយបង្ហាញផ្លូវកាន់តែប្រសើរជាងមុន។ មតិមួយចំនួនបានលើកឡើងថាគំនិតនៃការផ្ដល់បណ្ដាញទិន្នន័យពីលំហមកកាន់ឧបករណ៍ប្រើប្រាស់ដោយផ្ទាល់ហាក់ដូចជាមិនទំនង ពីព្រោះទិន្នន័យសម្រាប់ទំនាក់ទំនងនៃផ្កាយរណបភាគច្រើនត្រូវភ្ជាប់បណ្ដាញជាមួយទីស្នាក់ការនៅលើដីនិងបញ្ជូនបណ្ដាក់ទៅកាន់ឧបករណ៍ប្រើប្រាស់ផ្សេងៗទៀតនៅទីបញ្ចប់។ ខណៈពេលនេះគេនៅមិនទាន់ដឹងច្បាស់នូវអ្វីដែល Apple កំពុងធ្វើឬថាតើវានឹងទៅជាយ៉ាងណានោះដែរ៕