ដំណើរកំសាន្តបែបនេះ ធ្វើឲ្យអ្នកទាំងពីរ រឹតចំណងស្នេហ៍ដូចកំលោះក្រមុំ

គូស្នេហ៍វ័យចំណាស់ដែលមានអាយុជាង ៦០ ឆ្នាំហើយនោះ បានរស់នៅជាមួយគ្នាដោយបន្តក្តីសុបិន្តធ្វើដំណើរជុំវិញពិភពលោកជាមួយគ្នាអស់រយៈពេលជាង ៣ ឆ្នាំ បន្ទាប់ពីចូលនិវត្តន៍។

ពួកគាត់បាននិយាយថាការធ្វើដំណើរជាមួយគ្នាបានធ្វើឲ្យពួកគាត់លង់ស្នេហ៍ទៅវិញទៅមកម្តងទៀត ព្រមទាំងពង្រឹងទំនាក់ទំនងប្តីប្រពន្ធទៀតផង។

លោកចាង ក្វាងជូអាយុ ៧១ ឆ្នាំ និងលោកស្រី វ៉ាង ហ្សុងជីនអាយុ ៦៨ ឆ្នាំបានចាប់ផ្តើមធ្វើដំណើរក្នុងឆ្នាំ ២០០៨ មុនវិលត្រឡប់ទៅប្រទេសចិនវិញក្នុងឆ្នាំ ២០១១ បន្ទាប់ពីបានធ្វើដំណើរកំសាន្តជាមួយគ្នាជាង ៤០ ប្រទេស។ នេះបើយោងតាមសារព័ត៌មានចិនស៊ិនហួ។

លោកចាង បានរំឮកថាគំនិតនៃការធ្វើដំណើរឆ្លងកាត់ពិភពលោកជាមួយភរិយានេះ គឺបានកើតឡើងនៅពេលលោកជួបភ្ញៀវទេសចរបរទេសនៅយូណាន។ លោកមានការភ្ញាក់ផ្អើលយ៉ាងខ្លាំងដែលជនបរទេសម្នាក់ដែលមិនអាចនិយាយភាសាចិនកុកងឺបានផង តែអាចទៅកន្លែងដាច់ស្រយាល ទាំងមិនស្គាល់នរណាសោះ។ នោះហើយជាពេលដែលគាត់ សួរខ្លួនឯងថា ហេតុអ្វីបានជាគាត់ និងប្រពន្ធមិនសាកល្បងមើល?

វាអាចជាដំណើរផ្សងព្រេងនៃស្វាមីភរិយាដែលមានឥទ្ធិពលដល់សុភមង្គលរបស់ពួកគេ។លោកចាងបាននិយាយថាគាត់ចំណាយពេលជាងកន្លះថ្ងៃដើម្បីអានសៀវភៅសន្ទនាភាសាអង់គ្លេស។ មិនយូរប៉ុន្មានប្តីប្រពន្ធនេះបានធ្វើឱ្យអឺរ៉ុបក្លាយជាកន្លែងដំបូងនៃការធ្វើដំណើររបស់ពួកគេដោយចំណាយពេលបីខែនៃឆ្នាំ ២០០៨ ដើម្បីធ្វើដំណើរពាសពេញទ្វីប។

នេះជាប្រទេសខ្លះៗដែលអ្នកទាំងពីរបានសាងអនុស្សាវរីយ៍សម្រាប់ស្នេហ៍វ័យចំណាស់របស់ខ្លួន៖

- ឆ្នាំ ២០០៨៖ ប្រទេសក្រិក អ៊ីតាលី អេស្ប៉ាញ ព័រទុយហ្កាល់ បារាំង ហូឡង់ ប៊ែលហ្សិក អាល្លឺម៉ង់សាធារណរដ្ឋឆែក និងប្រទេសចំនួន ១៦ ផ្សេងទៀតនៅអឺរ៉ុប។

- ឆ្នាំ ២០០៩៖ សហរដ្ឋអាមេរិក កាណាដា ម៉ិចស៊ិកូ គុយបា នេប៉ាល់ និងឥណ្ឌា។

- ឆ្នាំ ២០១០៖ ប្រទេសរុស្ស៊ី

- ឆ្នាំ ២០១១៖ មាន ១៤ ប្រទេសនៅអាមេរិកខាងត្បូងរួមមានអាហ្សង់ទីន ប្រេស៊ីល ប៉េរូ នូវែលសេឡង់និងអូស្ត្រាលី។

មកដល់ពេលនេះ បើទោះអ្នកទាំងពីរ ឈប់ធ្វើដំណើរទៅក្រៅប្រទេសក៏ដោយ តែបច្ចុប្បន្នពួកគេនៅតែបន្តធ្វើដំណើរកំសាន្តនៅក្នុងប្រទេសចិន បង្ហោះរូបភាពយ៉ាងផ្អែមល្ហែម ដែលភាគច្រើនធ្វើឱ្យអ្នកលេងអ៊ីនធឺណេតជាច្រើនច្រណែនមិនស្ទើរទេ៕

ប្រភព៖ Says